ઈરાનમાં વિરોધ ઉગ્ર બન્યો છે, જે ડિસેમ્બર 2025ના અંતમાં આર્થિક મુશ્કેલીઓને કારણે ઉભો થયો હતો. તે હવે સમગ્ર દેશમાં ફેલાઈ ગયો છે અને ઈસ્લામિક રિપબ્લિકના અંતની માંગ કરતી રાષ્ટ્રીય ચળવળ બની ગઈ છે. ન્યૂયોર્ક ટાઈમ્સના અહેવાલ મુજબ, અમેરિકી રાષ્ટ્રપતિ ડોનાલ્ડ ટ્રમ્પને હાલમાં જ ઈરાન વિરુદ્ધ સૈન્ય વિકલ્પો અંગે બ્રિફિંગ આપવામાં આવી છે. આ વિકલ્પોમાં તેહરાનમાં પસંદગીના સ્થાનો પર હુમલાનો સમાવેશ થાય છે, ખાસ કરીને શાસનની આંતરિક સુરક્ષા સાથે સંબંધિત બિન-લશ્કરી માળખાં. જો કે હજુ સુધી કોઈ અંતિમ નિર્ણય લેવાયો નથી.
ટ્રમ્પ વહીવટીતંત્ર વિરોધીઓ પર ઈરાની સત્તાવાળાઓના ક્રેકડાઉનને રોકવા માટે રાજદ્વારી, આર્થિક અને લશ્કરી પગલાં પર વિચાર કરી રહ્યું છે. ઈરાનના શાસને વિરોધને ડામવા માટે દેશવ્યાપી ઈન્ટરનેટ બ્લેકઆઉટ લાદી દીધો છે. સુરક્ષા દળો તરફથી જીવંત ગોળીબાર અને ધરપકડના અહેવાલો છે. ટ્રમ્પે ટ્રુથ સોશિયલ પર પોસ્ટ કરીને કહ્યું, ‘ઈરાન પહેલા ક્યારેય આટલી આઝાદીની રાહ જોઈ રહ્યું ન હતું. અમેરિકા મદદ કરવા તૈયાર છે!
મેક ઈરાન ગ્રેટ અગેઈન દ્વારા આપવામાં આવેલ સ્લોગન
રિપબ્લિકન સેનેટર લિન્ડસે ગ્રેહામે પણ વિરોધીઓને ટેકો આપતા લખ્યું હતું કે ઈરાની લોકોનું લાંબુ સ્વપ્ન સમાપ્ત થવાનું છે. મેક ઈરાન ગ્રેટ અગેઈનનો નારો આપીને તેમણે આયાતુલ્લા શાસન વિરુદ્ધ મજબૂત સંકેત આપ્યો હતો. તેમણે કહ્યું કે વિરોધીઓની જીત થશે અને મદદની તૈયારી છે. માનવાધિકાર સંસ્થાઓ અને ઇન્સ્ટિટ્યૂટ ફોર ધ સ્ટડી ઓફ વોર અનુસાર, 10 જાન્યુઆરીએ 15 પ્રાંતોમાં 60 વિરોધ પ્રદર્શન થયા, જેમાંથી ઘણા મધ્યમ અને મોટા પાયાના હતા. આ પ્રદર્શનને 1979ની ઇસ્લામિક ક્રાંતિ પછીનું સૌથી મોટું આંદોલન માનવામાં આવે છે, જેમાં યુવાનો, વિદ્યાર્થીઓ અને સમાજના વિવિધ વર્ગો સામેલ છે. ઈરાની અધિકારીઓએ દેખાવકારોને કટ્ટરપંથી અને અમેરિકા અને ઈઝરાયેલના એજન્ટ ગણાવ્યા છે.
