ભારત સરકારે ડિજિટલ ઈન્ડિયા તરફ વધુ એક મોટું પગલું ભર્યું છે. હવે આધાર કાર્ડ ડાઉનલોડ કરવા માટે UIDAIની વેબસાઈટ પર જવાની જરૂર નથી કે અલગથી DigiLocker એપ ખોલવાની જરૂર નથી. સરકારે એક એવી સુવિધા શરૂ કરી છે, જેના દ્વારા તમે તમારા આધાર કાર્ડને સીધા જ WhatsApp પર ડાઉનલોડ કરી શકો છો. આ નવી સુવિધા MyGov હેલ્પડેસ્કના સત્તાવાર WhatsApp ચેટબોટની મદદથી ઉપલબ્ધ કરાવવામાં આવી છે.
અત્યાર સુધી આધાર ડાઉનલોડ કરવાની પ્રક્રિયા ઘણા લોકો માટે થોડી મુશ્કેલ લાગતી હતી. વેબસાઈટ પર લોગિન કરો, OTP ની રાહ જુઓ અને પછી PDF ડાઉનલોડ કરવામાં સમય લાગતો હતો. હવે આ પ્રક્રિયાને WhatsApp દ્વારા ઘણી સરળ બનાવી દેવામાં આવી છે, કારણ કે મોટાભાગના લોકો પહેલાથી જ આ એપનો દરરોજ ઉપયોગ કરે છે.
કેટલીક બાબતો ધ્યાનમાં રાખવી જરૂરી છે
નવી સેવાનો લાભ લેતા પહેલા કેટલીક મહત્વપૂર્ણ શરતો પૂરી કરવી જરૂરી છે. તમારી પાસે આધાર સાથે લિંક થયેલો મોબાઇલ નંબર, એક સક્રિય DigiLocker એકાઉન્ટ અને MyGov Helpdesk +91-9013151515 નો અધિકૃત WhatsApp નંબર તમારા ફોનમાં સેવ કરેલ હોવો આવશ્યક છે.
તમારે આ સ્ટેપ્સ ફોલો કરવા પડશે
આધાર કાર્ડ ડાઉનલોડ કરવાની પ્રક્રિયા ખૂબ જ સરળ છે,
- સૌથી પહેલા તમારા મોબાઈલમાં +91-9013151515 નંબર સેવ કરો.
- WhatsApp ખોલો અને આ નંબર પર ‘Hi’ અથવા ‘Namaste’ મોકલો.
- ચેટબોટ દ્વારા દર્શાવેલ મેનુમાંથી DigiLocker સેવાઓ પસંદ કરો.
- તમારા DigiLocker એકાઉન્ટની પુષ્ટિ કરો.
- હવે તમારો 12 અંકનો આધાર નંબર દાખલ કરો.
- તમારા રજિસ્ટર્ડ મોબાઈલ નંબર પર OTP આવશે, તેને એન્ટર કરો અને વેરિફાઈ કરો.
- એકવાર ચકાસણી પૂર્ણ થયા પછી, દસ્તાવેજોની સૂચિ દેખાશે.
- આધાર પસંદ કરો અને તમારું આધાર કાર્ડ પીડીએફ ફોર્મેટમાં WhatsApp પર ડાઉનલોડ થશે.
