Delhi-Mumbai Expressway 2027: ગુજરાતને રાજધાની દિલ્હી સાથે સીધું જોડતા નેશનલ એક્સપ્રેસ-વે 4 (દિલ્હી-મુંબઈ) ના ખુલવાની આતુરતાથી રાહ જોવાઈ રહી છે. 1,350 કિલોમીટર લાંબા કોરિડોર દ્વારા દિલ્હી અને મુંબઈને જોડવાનું છે, પરંતુ તેનો મોટો લાભ ગુજરાત અને અન્ય રાજ્યોને મળશે. ગુજરાતથી માત્ર દિલ્હીનું અંતર જ નહીં ઘટે પરંતુ મુંબઈ-દિલ્હી વચ્ચે માર્ગ મુસાફરીમાં પણ વધારો થશે. કેન્દ્રીય માર્ગ પરિવહન અને ધોરીમાર્ગ રાજ્ય મંત્રી હર્ષ મલ્હોત્રાએ દિલ્હી-મુંબઈ એક્સપ્રેસ-વે (NE4) ને લઈને મોટું અપડેટ આપ્યું છે. તેમણે દિલ્હીમાં એક પ્રેસ કોન્ફરન્સમાં જણાવ્યું હતું કે દિલ્હી-મુંબઈ એક્સપ્રેસ-વે 2027 સુધીમાં પૂર્ણ થઈ જશે.
12 કલાકમાં સમેટાઈ જશે મુસાફરી
હર્ષ મલ્હોત્રાએ જણાવ્યું હતું કે આ રૂટ દિલ્હી અને મુંબઈ વચ્ચેની મુસાફરીનો સમય હાલના 33 કલાકથી ઘટાડીને માત્ર 12 કલાક કરી દેશે. તેમણે કહ્યું કે આ રૂટ આર્થિક એકીકરણમાં ઘણો સુધારો કરશે. આ ઉપરાંત, કેન્દ્ર સરકાર દિલ્હીમાં ટ્રાફિક જામ ઘટાડવા માટે ઘણી યોજનાઓ પર કામ કરી રહી છે. તેમણે એમ પણ જણાવ્યું કે આ વર્ષના બજેટમાં દેશભરમાં રોડ ઈન્ફ્રાસ્ટ્રક્ચર પ્રોજેક્ટ્સ માટે આશરે ₹3 લાખ કરોડ ફાળવવામાં આવ્યા છે. આ ફાળવણી રાષ્ટ્રીય રોડ નેટવર્કના વિસ્તરણમાં મદદ કરશે. દિલ્હી-મુંબઈ એક્સપ્રેસ-વેથી હરિયાણા, રાજસ્થાન, મધ્ય પ્રદેશ, ગુજરાત અને મહારાષ્ટ્રને ફાયદો થવાની અપેક્ષા છે.
ડેડલાઇન ચૂકી ગયા છીએ
મુંબઈ-અમદાવાદ બુલેટ ટ્રેન પ્રોજેક્ટની જેમ દિલ્હી-મુંબઈ એક્સપ્રેસ-વે દેશના મોટા ઈન્ફ્રાસ્ટ્રક્ચર પ્રોજેક્ટ્સમાંનો એક છે. હર્ષ મલ્હોત્રા પહેલા કેન્દ્રીય મંત્રી નિતિન ગડકરીએ કહ્યું હતું કે દિલ્હી-મુંબઈ એક્સપ્રેસ-વે (DME) હવે 2027-28 સુધીમાં સંપૂર્ણ રીતે પૂર્ણ થવાની સંભાવના છે. આ એક્સપ્રેસ-વેની મૂળ ડેડલાઇન માર્ચ 2024 હતી. તેના નિર્માણ કાર્યમાં અત્યાર સુધીમાં લગભગ બે વર્ષનો વિલંબ થયો છે. મધ્ય પ્રદેશ, રાજસ્થાન અને ગુજરાતમાં આ એક્સપ્રેસ-વેના કેટલાક ભાગો પહેલેથી જ ખુલી ગયા છે. ગુજરાત અને મધ્ય પ્રદેશ બોર્ડર વચ્ચેનો એક પેચ ટૂંક સમયમાં ખુલવાની ધારણા છે. આનાથી હાલમાં બંને રાજ્યો વચ્ચે અવરજવર ઝડપી બનશે.
