ભારતીય ટીમના કેપ્ટન સૂર્યકુમાર યાદવે શનિવારે અમેરિકા સામેની મેચમાં અણનમ 84 રનની જોરદાર ઇનિંગ રમી હતી. સૂર્યકુમાર યાદવની અડધી સદીના આધારે ભારતીય ટીમ 20 ઓવરમાં 9 વિકેટે 161 રન બનાવવામાં સફળ રહી હતી. ભારતના મોટાભાગના બેટ્સમેનો અપેક્ષા મુજબનું પ્રદર્શન કરી શક્યા ન હતા. ભારત તરફથી માત્ર 4 બેટ્સમેન ડબલ ફિગર સુધી પહોંચી શક્યા. આ શાનદાર ઇનિંગ્સના કારણે સૂર્યકુમાર યાદવ કેપ્ટન તરીકે ટી-20 વર્લ્ડ કપની ડેબ્યૂ ઇનિંગમાં સૌથી વધુ રન બનાવનાર બીજો ખેલાડી બની ગયો છે.
ભારતીય ટીમના કેપ્ટન સૂર્યકુમાર યાદવે મુંબઈના વાનખેડે સ્ટેડિયમમાં 49 બોલમાં 84 રનની અણનમ ઇનિંગ રમી હતી. ટી20 વર્લ્ડ કપમાં કેપ્ટન તરીકે પોતાની ડેબ્યૂ ઇનિંગમાં સૌથી વધુ સ્કોર બનાવવાનો રેકોર્ડ ક્રિસ ગેલના નામે છે. ગેલે 2009માં ઓવલમાં ઓસ્ટ્રેલિયા સામે 88 રનની ઇનિંગ રમી હતી.ભારતીય કેપ્ટન સૂર્યકુમાર યાદવે 84 રન બનાવીને પાકિસ્તાનના ભૂતપૂર્વ કેપ્ટન બાબર આઝમનો રેકોર્ડ તોડ્યો છે. પાકિસ્તાની બેટ્સમેને દુબઈ 2021માં ભારત સામે અણનમ 68 રન બનાવ્યા હતા.
અમેરિકાએ ટોસ જીતીને પ્રથમ બોલિંગ કરવાનો નિર્ણય કર્યો હતો. બેટિંગ કરવા આવેલી ભારતીય ટીમની શરૂઆત સારી રહી ન હતી અને તેણે અભિષેક શર્મા (0)ની વિકેટ ગુમાવી હતી. આ પછી તિલક વર્મા અને ઇશાન કિશને ઇનિંગ સંભાળી હતી. બંને બેટ્સમેન વચ્ચે 37 રનની ભાગીદારી નોંધાઈ હતી. શેડલી વેન શાલ્કવીકે છઠ્ઠી ઓવરમાં ત્રણ વિકેટ લઈને ભારતને બેકફૂટ પર લાવી દીધું હતું. ઈશાન કિશન (20), તિલક વર્મા (25) અને શિવમ દુબે (શૂન્ય), હાર્દિક પંડ્યા (પાંચ) રન બનાવી આઉટ થયા હતા.
અક્ષર પટેલે સૂર્યકુમાર યાદવ સાથે મળીને 77 રનમાં છ વિકેટ ગુમાવ્યા બાદ મુશ્કેલીમાં મુકાયેલી ભારતીય ટીમને સંભાળી હતી. બંને બેટ્સમેનોએ સાતમી વિકેટ માટે 41 રન જોડ્યા હતા. હરમિત સિંહે 17મી ઓવરમાં અક્ષર પટેલ (14)ને આઉટ કરીને આ ભાગીદારીનો અંત કર્યો હતો. અર્શદીપ સિંહ (ચાર) અને વરુણ ચક્રવર્તી (શૂન્ય) આઉટ થયા હતા, જો કે, સૂર્યકુમાર યાદવે એક છેડો પકડીને ઝડપી ગતિએ રન બનાવ્યા હતા. ભારતે નિર્ધારિત 20 ઓવરમાં નવ વિકેટે 161 રન બનાવ્યા હતા. સૂર્યકુમાર યાદવે 49 બોલમાં 10 ચોગ્ગા અને ચાર છગ્ગા સાથે 84 રનની અણનમ ઇનિંગ રમી હતી.
