Chhari Dhand Ramsar Site Gujarat: ગાંધીનગર: ગુજરાતના કચ્છ જિલ્લામાં આવેલ છારી ઢાંડ વેટલેન્ડ કન્ઝર્વેશન રિઝર્વ (Chhari Dhand Wetland Conservation Reserve) ને સત્તાવાર રીતે રામસર સાઇટ જાહેર કરવામાં આવી છે. આ જાહેરાત સાથે જ છારી ઢાંડ હવે આંતરરાષ્ટ્રીય મહત્વ ધરાવતું વેટલેન્ડ બની ગયું છે. 31 જાન્યુઆરી, 2026 ના રોજ કરવામાં આવેલી આ જાહેરાત ભારતની આદ્રભૂમિ (વેટલેન્ડ) સંરક્ષણની દિશામાં એક મોટી ઉપલબ્ધિ માનવામાં આવે છે.
વન અને પર્યાવરણ મંત્રી અર્જુન મોઢવાડિયાએ ગાંધીનગરમાં મુખ્યમંત્રી ભૂપેન્દ્ર પટેલને આ રામસર પ્રમાણપત્ર અર્પણ કર્યું હતું. આ સાથે જ છારી ઢાંડ ગુજરાતની પાંચમી અને કચ્છ પ્રદેશની પહેલી રામસર સાઇટ બની છે.
છારી ઢાંડ વેટલેન્ડની ખાસિયતો
વિસ્તાર: આ વેટલેન્ડ 22,700 હેક્ટરમાં ફેલાયેલું છે અને 12 ગામોને આવરી લે છે.
સ્થાન: તે શુષ્ક રણ અને ઘાસના મેદાનની ઇકોસિસ્ટમ વચ્ચે આવેલું છે.
પક્ષીઓની વિવિધતા: અહીં પક્ષીઓની 187 થી વધુ પ્રજાતિઓ જોવા મળે છે. એક અંદાજ મુજબ, અહીં એક સમયે 2 લાખથી વધુ પક્ષીઓ જોવા મળ્યા છે.
મધ્ય એશિયાઈ ફ્લાયવે: તે મધ્ય એશિયાઈ ફ્લાયવે પર આવતા પ્રવાસી પક્ષીઓ માટે અત્યંત મહત્વનું રહેઠાણ છે. અહીં 4 લાખથી વધુ કોમન ક્રેન્સ (સારસ) પણ જોવા મળ્યા છે.
ગુજરાતની અન્ય 4 રામસર સાઇટ્સ
નળ સરોવર પક્ષી અભયારણ્ય (2012)
થોળ તળાવ વન્યજીવ અભયારણ્ય (2021)
વધવાણા વેટલેન્ડ (2021)
ખીજડીયા પક્ષી અભયારણ્ય (2022)
52 દેશોના પ્રવાસીઓ માટે આકર્ષણનું કેન્દ્ર
છારી ઢાંડમાં આવતા પ્રવાસીઓમાંથી 80% થી વધુ પ્રવાસીઓ વિદેશી હોય છે. મુખ્યત્વે અમેરિકા, બ્રિટન, ઓસ્ટ્રેલિયા, ફિનલેન્ડ અને નેધરલેન્ડ જેવા 52 થી વધુ દેશોના પક્ષીપ્રેમીઓ અને સંશોધકો અહીં મુલાકાત લે છે. અહીં જોવા મળતું ‘ગ્રે હાઈપોકોલિયસ’ પક્ષી વૈશ્વિક સ્તરે ખૂબ જ મહત્વનું અને દુર્લભ માનવામાં આવે છે.
