કોમ્બિંગ દરમિયાન પોલીસે ૩ શકમંદોની અટકાયત કરી, મારક હથિયારો કબજે-બે ઈસમો એક પીકઅપ ફોર વ્હીલર ગાડીમાં ૭ ભેંસો બાંધી પસાર થઈ રહ્યા હતા
દાહોદ, દાહોદ શહેરમાં લઘુમતી વિસ્તાર ગણાતા કસ્બા પટણી ચોક વિસ્તારમાં ગૌરક્ષકોની ટીમે પીકઅપ ફોર વ્હીલર ગાડીમાં કતલ કરવાને ઈરાદે લઈ જવાતા પશુઓને બચાવવાનો પ્રયાસ કરી પીછો કરતા કસ્બા વિસ્તારમાં ટોળાએ ગૌરક્ષકોની ટીમ પર માર ક હથિયારો વડે તેમજ પથ્થરમારાની ઘટનાને પગલે વાતાવરણ તંગ બન્યું હતું. ઘટનાની જાણ પોલીસને થતાં દાહોદ પોલીસનો કાફલો ઘટના સ્થળે પહોંચી ગયો હતો. પોલીસ કાફલો પહોંચતાની સાથે ટોળુ વિખેરાઈ ગયું હતું.
તો બીજી તરફ ઘટનામાં ઈજાગ્રસ્ત બે ગૌરક્ષકોને નજીકના દવાખાને સારવાર માટે લઈ જવામાં આવ્યા હતા. પોલીસે સ્થળ પર કોમ્બીંગ હાથ ધરી બે જેટલા ઈસમોની અટકાયત કરી હોવાનું અને આ ઘટનામાં સામેલ ૧ર જેટલા ઈસમો વિરૂધ્ધ ગુનો નોંધી અન્ય ફરાર આરોપીઓની ધરપકડના ચક્રો ગતિમાન કર્યાનું જાણવા મળે છે.
રાત્રીના બે વાગ્યાની આસપાસ કસ્બા વિસ્તારમાં રહેતા અબરાર મકરાણી અને તેની સાથેનો પીન્ટુ કુરેશી એમ બંને ઈસમો એક પીકઅપ ફોર વ્હીલર ગાડીમાં ૭ ભેંસો બાંધી પસાર થઈ રહ્યા હતા. આ અંગેની જાણ દાહોદના ગૌરક્ષકોને થતાં ગૌરક્ષકોની ટીમે પશુઓને બચાવવા માટે ઉપરોકત પીકઅપ ગાડીનો પીછો કર્યો હતો
ત્યારે પીકઅપ ગાડી દાહોદ શહેરના કસ્બા પટણી ચોક વિસ્તાર ખાતે પહોંચતાની સાથે આ વિસ્તારમાં લોકોએ ગૌરક્ષકોની ટીમ પર પથ્થરમારો કરી મારક હથિયારો જેવા કે લાકડી, પાઈપો વિગેરેથી ગૌરક્ષકો પર તુટી પડ્યા હતાં. ગૌરક્ષકો પર હુમલો કરનાર આરોપીઓમાં અબરાર મકરાણી, પીન્ટુ કુરેશી, રજાક અબ્દુરહીમ ડોકીલા, અન્સાર ઈદરીશ ભુંગા, અરબાજ સોયબ જાડા, નઈમ કુરેશી,
રાજા ઈદરીશ પાટુક, શાહરૂખ છોટા કુરેશી, કાસમ (રાજકનો ભાણેજ), સિકદર અશરફ દલાલ, કાળો ઉર્ફે સહેજાદ સામદ અને શાહબાદ બજારીયા (તમામ રહે. કસ્બા, દાહોદ, તા.જિ. દાહોદ)નાઓ તથા તેમની સાથે અન્ય બીજા ૬ થી સાત ઈસમો દ્વારા ગૌરક્ષકોની ટીમ પર હુમલો કરવામાં આવ્યો હતો.
આ હુમલામાં હિરલભાઈ કંથારીયા અને હીમાંશુ યાદવને શરીરે ઈજાઓ પહોતા બંનેને નજીકના દવાખાને સારવાર માટે લઈ જવામાં આવ્યા હતા. પોલીસે ઘટના સ્થળે કોમ્બીંગ હાથ ધરી બે શંકાસ્પદ ઈસમોની અટકાયત પણ કરી હતી.
