અમેરિકી રાષ્ટ્રપતિ ડોનાલ્ડ ટ્રમ્પે ઈરાનના ખર્ગ દ્વીપને નિશાન બનાવવાની ધમકી આપ્યા બાદ ઈરાને દુબઈ પોર્ટ પાસે મોટો હુમલો કર્યો છે. ઈરાને અહીં તેલથી ભરેલા ઓઈલ ટેન્કરને ઉડાવી દીધું છે, જેમાં લગભગ બે ડઝન લોકો સવાર હતા. કુવૈત પેટ્રોલિયમ કોર્પોરેશન (KPC) એ એક નિવેદનમાં કહ્યું કે, ઈરાને દુબઈ પોર્ટના એન્કરેજ વિસ્તારમાં તેલથી ભરેલા આ કુવૈતી ટેન્કર પર હુમલો કર્યો છે. હુમલાના કારણે ટેન્કરમાં આગ લાગી હતી.
પર્સિયન ગલ્ફમાં જહાજો પર ઈરાનનો નવીનતમ હુમલો મધ્યરાત્રિ પછી થયો હતો. આ વખતે ઈરાને ‘અલ-સલમી’ નામના વિશાળ ક્રૂડ ઓઈલ ટેન્કરને નિશાન બનાવ્યું હતું. અધિકારીઓએ કહ્યું છે કે તે સમયે જહાજમાં 24 ક્રૂ મેમ્બર હતા, જેમને સુરક્ષિત રીતે બહાર કાઢવામાં આવ્યા છે.
કેપીસીએ એક નિવેદનમાં જણાવ્યું હતું કે, “ઇમરજન્સી રેસ્ક્યુ અને ફાયર ટીમોને તાત્કાલિક ઘટનાસ્થળે રવાના કરવામાં આવી હતી. તેઓ હાલમાં પરિસ્થિતિને કાબૂમાં લેવા અને નિયંત્રણ કરવા સંબંધિત અધિકારીઓ સાથે કામ કરી રહ્યા છે.” કેપીસીએ આશંકા વ્યક્ત કરી હતી કે આ હુમલાને કારણે આસપાસના પાણીમાં તેલ ફેલાઈ શકે છે.
ઈરાનના હુમલા ચાલુ છે
નોંધનીય છે કે ઈરાને 28 ફેબ્રુઆરીએ અમેરિકન અને ઈઝરાયેલના હુમલા બાદથી અખાત અને હોર્મુઝની સ્ટ્રેટમાં વેપારી જહાજોને સતત નિશાન બનાવ્યા છે. આ પહેલા સોમવારે સાઉદી અરેબિયાના રાસ તનુરાના દરિયાકાંઠે ગ્રીક ધ્વજવાળા કન્ટેનર જહાજ પર પણ હુમલાની જાણ થઈ હતી. તે જ સમયે, ઈરાન ખાડી દેશોના ઉર્જા મથકો પર સતત ડ્રોન અને મિસાઈલ છોડી રહ્યું છે.
