અમેરિકા અને ઈરાન વચ્ચેના તાજેતરના યુદ્ધ બાદ ભારત સહિત વિશ્વના ઘણા દેશોમાં ઈંધણની કટોકટી સર્જાઈ છે. સપ્લાય ચેઇન અટકી જવાને કારણે આયાત પર નિર્ભર દેશોમાં એલપીજીથી લઈને પેટ્રોલ ડીઝલ સુધીની દરેક વસ્તુ માટે હોબાળો મચ્યો છે. યુદ્ધ શરૂ થયાને 2 મહિનાથી વધુ સમય વીતી ગયો છે, પરંતુ યુએસ અને ઈરાન પીછેહઠ કરવા તૈયાર નથી, જેના કારણે હોર્મુઝ સ્ટ્રેટ હજુ પણ બંધ છે. દરમિયાન, ઈરાન હવે એવા હથિયારનો ઉપયોગ કરી શકે છે જે ઘણા દેશોમાં ઈન્ટરનેટને સ્થગિત કરી શકે છે. હોર્મુઝ પર નાકાબંધી કર્યા પછી, ઈરાને તાજેતરમાં સમુદ્રની અંદરના ઈન્ટરનેટ કેબલને હથિયાર બનાવવાની ધમકી આપી છે.
અહેવાલો અનુસાર, ઈરાન સ્ટ્રેટ ઓફ હોર્મુઝની નીચે નાખવામાં આવેલા કેબલ્સને નિશાન બનાવી શકે છે, જેના દ્વારા ખાડી દેશો, એશિયા અને યુરોપ વચ્ચે ડેટા ટ્રાન્સફર કરવામાં આવે છે. તે જ સમયે, ઈરાન વિશ્વની સૌથી મોટી ટેક કંપનીઓ પાસેથી આ કેબલ પર ‘ટોલ ટેક્સ’ વસૂલવાની તૈયારી કરી રહ્યું છે. ઈરાની રિવોલ્યુશનરી ગાર્ડ્સ (IRGC) સાથે જોડાયેલા મીડિયા અને લશ્કરી પ્રવક્તા ઈબ્રાહિમ ઝોલ્ફાઘરીએ તાજેતરમાં સોશિયલ મીડિયા પર એક પોસ્ટમાં આ ધમકી આપી હતી. “અમે ઇન્ટરનેટ કેબલ પર ટેરિફ લાદીશું,” તેમણે કહ્યું.
શું છે ઈરાનની યોજના?
આ પ્લાન મુજબ ઈરાન આ કેબલના ઉપયોગ માટે ગૂગલ, માઇક્રોસોફ્ટ, મેટા અને એમેઝોન જેવી મોટી કંપનીઓ પાસેથી ભારે ફી વસૂલશે. આ અંડરસી કેબલ્સના સમારકામ અને જાળવણીનું કામ ફક્ત ઈરાની કંપનીઓને જ આપવામાં આવશે. ઈરાનનું કહેવું છે કે જો ટેક કંપનીઓ ઈરાનના કાયદાનું પાલન નહીં કરે તો આ રૂટ પર ઈન્ટરનેટ ટ્રાફિક બંધ થઈ શકે છે.
હોર્મુઝ હેઠળ ઈન્ટરનેટ લાઈફલાઈન
મળતી માહિતી મુજબ આ દરિયાઈ માર્ગની નીચે અનેક મહત્વપૂર્ણ કેબલ સિસ્ટમ કાર્યરત છે.
