નવી દિલ્હી: ઈન્ડિયન પ્રીમિયર લીગ (IPL) 2026 શનિવારથી શરૂ થવા જઈ રહી છે, જે પહેલા બાંગ્લાદેશ સરકારે પોતાના દેશમાં આ લીગના પ્રસારણ માટેના દરવાજા ખોલી દીધા છે. મીડિયા રિપોર્ટ્સ અનુસાર, નવનિયુક્ત માહિતી અને પ્રસારણ મંત્રી ઝહીર ઉદ્દીન સ્વપને કહ્યું છે કે બાંગ્લાદેશમાં આગામી IPL સિઝનના પ્રસારણ પર કોઈ પ્રતિબંધ નથી.
‘ડૉઇશ વેલે’ અનુસાર, ઝહીર ઉદ્દીન સ્વપને કહ્યું, “કોઈએ અમને આઈપીએલના પ્રસારણ માટે અરજી કરી નથી. અમે રમતમાં રાજકારણને ભેળવવા માંગતા નથી. અમે તેને વ્યવસાયિક દ્રષ્ટિકોણથી જોઈશું. જો કોઈ ચેનલ આઈપીએલના પ્રસારણ માટે અરજી કરશે તો અમે તેને સકારાત્મક રીતે ધ્યાનમાં લઈશું.”
આ પહેલા યુવા અને રમતગમતના રાજ્ય મંત્રી અમીનુલ હકે ‘ક્રિકબઝ’ને કહ્યું હતું કે તેઓ અગાઉની વચગાળાની સરકાર દ્વારા લાદવામાં આવેલા IPL ટેલિકાસ્ટ પરના પ્રતિબંધ અંગે સંબંધિત અધિકારીઓ સાથે વાત કરશે.
જ્યારે સ્વપનને પૂછવામાં આવ્યું કે શું સ્ટાર સ્પોર્ટ્સ IPL ટેલિકાસ્ટ કરી શકે છે, ત્યારે સ્વપને તે થવાનો ઈશારો કરતા કહ્યું, “અમે તેને ટેલિકાસ્ટ કરતા કોઈને રોકીશું નહીં. જો સ્ટાર સ્પોર્ટ્સ તેને ટેલિકાસ્ટ કરવા માંગે છે, તો તે કરી શકે છે. જો અમારી કોઈપણ ચેનલ તેને ટેલિકાસ્ટ કરવા માંગે છે, તો અમે તેને હકારાત્મક રીતે લઈશું, પરંતુ અમે કોઈને દબાણ કરીશું નહીં.”
કેબલ ઓપરેટર્સ એસોસિયેશન ઓફ બાંગ્લાદેશના ઓફિસ સેક્રેટરી રેઝાઉલ કરીમ લાબલુ કહે છે કે તેઓ સ્ટાર સ્પોર્ટ્સને IPLનું પ્રસારણ કરતા અટકાવશે નહીં કારણ કે સરકાર તરફથી આ સંબંધમાં કોઈ સૂચના મળી નથી.
IPL 2026 ની પ્રથમ મેચ 28 માર્ચે રોયલ ચેલેન્જર્સ બેંગ્લોર (RCB) અને સનરાઈઝર્સ હૈદરાબાદ (SRH) વચ્ચે રમાશે. બીજા દિવસે મુંબઈ ઈન્ડિયન્સ (MI)ની ટીમ કોલકાતા નાઈટ રાઈડર્સ (KKR) નો સામનો કરશે. ભારતીય ક્રિકેટ કંટ્રોલ બોર્ડ (BCCI)એ થોડા દિવસો પહેલા આ સિઝનના બીજા તબક્કાનું શેડ્યૂલ જાહેર કર્યું છે. લીગ તબક્કાની મેચો 24 મે સુધી રમવાની છે. પ્લેઓફ મેચોનું શેડ્યૂલ થોડા દિવસોમાં જાહેર થવાની ધારણા છે.
