દેશની સૌથી મોટી એરલાઈન કંપની ઈન્ડિગોએ જે રીતે થોડા દિવસોમાં હજારો ફ્લાઈટ્સ કેન્સલ કરી છે, તેના આવનારા દિવસો પરેશાનીઓથી ભરેલા હોઈ શકે છે. સરકારે ઈન્ડિગો એરલાઈન પર પણ કાર્યવાહી કરી છે. સરકારે એરલાઈન્સ ફ્લાઈટ્સમાં 5 ટકાનો ઘટાડો કરવાનો આદેશ આપ્યો છે. ડિરેક્ટોરેટ જનરલ ઓફ સિવિલ એવિએશન (DGCA) સંપૂર્ણ એક્શન મોડમાં છે. નાગરિક ઉડ્ડયન પ્રધાન કે. રામ મોહન નાયડુએ સોમવારે જણાવ્યું હતું કે એરલાઇનના તાજેતરના મોટા પાયે ઓપરેશનલ વિક્ષેપોને પગલે સરકાર ઇન્ડિગોની શિયાળાની ફ્લાઇટના સમયપત્રકમાં ઘટાડો કરશે અને તેને અન્ય ઓપરેટરોને ફાળવશે. હવે ઈન્ડિગો પાસેથી દરરોજ લગભગ 110 ફ્લાઈટ્સ છીનવી શકાશે. જો ઈન્ડિગાના વલણમાં સુધારો નહીં થાય તો કાર્યવાહી વધુ કડક બની શકે છે. નાયડુએ કહ્યું હતું કે સરકાર ઈન્ડિગો પર કાર્યવાહી કરીને એક ઉદાહરણ સ્થાપિત કરશે.
નાયડુએ દૂરદર્શન ન્યૂઝ ચેનલને જણાવ્યું હતું કે, “અમે ઈન્ડિગોના રૂટ ઘટાડીશું. તેઓ અત્યારે 2,200 ફ્લાઈટ્સ ચલાવી રહ્યા છે. અમે ચોક્કસપણે તેમને ઘટાડીશું.” મંત્રીએ એમ પણ કહ્યું કે 1 થી 8 ડિસેમ્બર (સાંજે 5 વાગ્યા સુધી) રદ કરાયેલા 7,30,655 PNR માટે 745 કરોડ રૂપિયા આપવામાં આવ્યા છે. આ ઉપરાંત, 9,000 મુસાફરોની બેગમાંથી 6,000 પરત કરવામાં આવી છે, એમ તેમણે જણાવ્યું હતું. અને બાકીની થેલીઓ આજે રાત્રે અથવા મંગળવારે સવાર સુધીમાં આપી દેવામાં આવશે.
તમને જણાવી દઈએ કે ઈન્ડિગોના શેર પહેલા જ ક્રેશ થઈ ચૂક્યા છે. સરકારના પગલાથી ઈન્ડિગોના માર્કેટ શેર પર નકારાત્મક અસર પડશે. તમને જણાવી દઈએ કે 5 ડિસેમ્બરે ઈન્ડિગોની 100 થી વધુ સેવાઓ પ્રભાવિત થઈ હતી. આ પછી લાખો મુસાફરો ત્રસ્ત બન્યા હતા. લોકો એરપોર્ટ પર અટવાયા હતા. મુસાફરો વૈકલ્પિક ફ્લાઈટની પણ વ્યવસ્થા કરી શક્યા નથી. આ પછી ડીજીસીએએ ઈન્ડિગોને કારણ બતાવો નોટિસ જારી કરી હતી. ઈન્ડિગોએ કહ્યું કે તે સમગ્ર સંકટ માટે જવાબદાર નથી.
ઈન્ડિગોએ જણાવ્યું હતું કે નાની ટેકનિકલ ખામીઓ, શિયાળાના સમયપત્રકના અમલીકરણમાં ફેરફાર, એર ટ્રાફિક પર ભીડમાં વધારો, ખરાબ હવામાન અને નવી ક્રૂ ડ્યુટી સમય મર્યાદા એટલે કે FDTL ફેઝ-2ને કારણે ફ્લાઈટ્સ રદ કરવી પડી છે. એરલાઈને કહ્યું કે ક્રૂ રોસ્ટરિંગમાં મોટા ફેરફારો કરવામાં આવ્યા છે જેના કારણે સમગ્ર નેટવર્ક ખરાબ રીતે પ્રભાવિત થયું છે. ક્રૂ પણ ઉપલબ્ધ નથી. ઈન્ડિગોએ DGCA મેન્યુઅલને ટાંકીને 15 દિવસનો વધારાનો સમય માંગ્યો છે.
