વડોદરાના BCA સ્ટેડિયમમાં રમાયેલી WPL 2026ની અત્યંત રોમાંચક મેચમાં ગુજરાત જાયન્ટ્સે મુંબઈ ઈન્ડિયન્સને 11 રને હરાવીને ઈતિહાસ રચ્યો છે. આ મેચમાં ગુજરાતે ટોસ જીતીને પ્રથમ બેટિંગ કરવાનો નિર્ણય લીધો હતો, જે WPLની છેલ્લી 40 મેચોમાં પ્રથમ વખત જોવા મળ્યો હતો જ્યારે કોઈ ટીમે ટોસ જીત્યા બાદ બોલિંગ કરવાનું પસંદ કર્યું ન હતું. આ જીત ગુજરાત માટે પણ ખાસ છે કારણ કે લીગના ઈતિહાસમાં સતત 8 પરાજય બાદ મુંબઈ ઈન્ડિયન્સ સામેની આ પ્રથમ જીત છે. આ મહત્વપૂર્ણ જીત સાથે ગુજરાત જાયન્ટ્સ સત્તાવાર રીતે એલિમિનેટર માટે ક્વોલિફાય થઈ ગયું છે.
પ્રથમ બેટિંગ કરતા ગુજરાત જાયન્ટ્સે 20 ઓવરમાં 4 વિકેટ ગુમાવીને 167 રન બનાવ્યા હતા. ટીમ વતી એશ્લે ગાર્ડનરે 46 રનની શાનદાર ઇનિંગ રમી હતી, જ્યારે જ્યોર્જિયા વેરહેમે અણનમ 44 રન ફટકારીને સ્કોરને 165થી આગળ લઈ જવામાં મહત્વની ભૂમિકા ભજવી હતી. સોફી ડિવાઈને પણ 25 રનની ઉપયોગી ઈનિંગ રમી હતી. મુંબઈ ઈન્ડિયન્સ તરફથી બોલિંગ કરવામાં અમેલિયા કેર સૌથી સફળ રહી, તેણે 26 રનમાં 2 વિકેટ લીધી. શબનમ ઈસ્માઈલ અને નેટ સાયવર-બ્રન્ટને એક-એક સફળતા મળી.
168 રનના લક્ષ્યનો પીછો કરવા ઉતરેલી મુંબઈ ઈન્ડિયન્સની શરૂઆત ખૂબ જ ખરાબ રહી હતી. ટીમે 7 ઓવરમાં માત્ર 37 રનમાં 3 વિકેટ ગુમાવી દીધી હતી. અહીંથી સુકાની હરમનપ્રીત કૌરે બાજી સંભાળી અને 48 બોલમાં અણનમ 82 રનની તોફાની ઈનિંગ રમીને મેચને છેલ્લી ઓવર સુધી લઈ ગઈ. હરમનપ્રીતે પોતાની ઇનિંગ્સમાં ઘણી શાનદાર સિક્સર ફટકારી હતી, પરંતુ તેને બીજા છેડેથી કોઈ સપોર્ટ મળ્યો નહોતો. રસપ્રદ વાત એ છે કે ડબ્લ્યુપીએલમાં આ પ્રથમ વખત છે જ્યારે હરમનપ્રીતની અડધી સદી છતાં મુંબઈ ઈન્ડિયન્સને હારનો સામનો કરવો પડ્યો હોય. મુંબઈની ટીમ 20 ઓવરમાં 7 વિકેટે 156 રન જ બનાવી શકી હતી.
તેમના બોલરો અને ચુસ્ત ફિલ્ડિંગે ગુજરાતની જીતમાં મુખ્ય ભૂમિકા ભજવી હતી. સોફી ડિવાઈને શાનદાર બોલિંગ કરી અને 4 ઓવરમાં માત્ર 23 રન આપીને 2 વિકેટ લીધી. તેણે હેલી મેથ્યુસ અને નેટ સાયવર-બ્રન્ટ જેવા મોટા બેટ્સમેનોને પેવેલિયનમાં મોકલ્યા હતા. એશ્લે ગાર્ડનરે છેલ્લી ઓવરમાં 26 રન બચાવવાની જવાબદારી ખૂબ જ સારી રીતે નિભાવી હતી. તેણે પૂનમ ખેમનરની વિકેટ લઈને મુંબઈની બાકી રહેલી આશાઓ પર પૂર્ણવિરામ મૂક્યું હતું. જ્યોર્જિયા વેરહેમે એમેલિયા કેર (25 રન)ની મહત્વની વિકેટ લઈને મુંબઈની ભાગીદારી તોડી હતી, જે મેચનો ટર્નિંગ પોઈન્ટ સાબિત થયો હતો. આ હાર છતાં ટૂર્નામેન્ટમાં મુંબઈ ઈન્ડિયન્સની આશા હજુ પૂરી થઈ નથી.
