ઈરાન પર હુમલા રોકવાની જાહેરાત બાદ અમેરિકી રાષ્ટ્રપતિ ડોનાલ્ડ ટ્રમ્પનો સૂર પણ બદલાયો હોય તેવું લાગી રહ્યું છે. છેલ્લા 24 કલાકમાં ટ્રમ્પે ઘણી વખત દાવો કર્યો છે કે ઈરાન અમેરિકા સાથે વાતચીત કરવા માટે રાજી થઈ ગયું છે અને બંને દેશો યુદ્ધ રોકવા માટે સમજૂતી પર પહોંચવાનો પ્રયાસ કરી રહ્યા છે. જો કે હજુ સુધી ઈરાન તરફથી આવા કોઈ સ્પષ્ટ સંકેતો મળ્યા નથી. આ દરમિયાન હવે ટ્રમ્પે વધુ એક મોટો દાવો કર્યો છે. અમેરિકી રાષ્ટ્રપતિએ કહ્યું છે કે ઈરાન ભવિષ્યમાં ક્યારેય પરમાણુ હથિયાર નહીં રાખવા માટે સંમત છે. ટ્રમ્પે એમ પણ કહ્યું કે ઈરાને અમેરિકાને હોર્મુઝ સ્ટ્રેટને લગતી મોટી ભેટ મોકલી છે.
મંગળવારે ઓવલ ઓફિસમાં પત્રકારો સાથે વાત કરતા ટ્રમ્પે દાવો કર્યો હતો કે ઈરાન સમાધાન કરવા તૈયાર છે. ટ્રમ્પે કહ્યું કે આ વાતચીતનું નેતૃત્વ ઉપરાષ્ટ્રપતિ જેડી વેન્સ, સેક્રેટરી ઓફ સ્ટેટ માર્કો રુબિયો, મધ્ય પૂર્વ માટે ટ્રમ્પના વિશેષ દૂત સ્ટીવ વિટકોફ અને જેરેડ કુશનરે કર્યું હતું. ટ્રમ્પે પોતાના નિવેદનમાં કહ્યું, “હું અગાઉથી કંઈ કહેવા માંગતો નથી, પરંતુ તેઓ એ વાત પર સહમત થયા છે કે તેઓ ક્યારેય પરમાણુ શસ્ત્રો ધરાવશે નહીં.”
અમેરિકાને ભેટ?
તેમણે વધુમાં કહ્યું કે ઈરાની નેતૃત્વએ અમેરિકાને હોર્મુઝ અને તેલની સપ્લાય સંબંધિત મોટી ભેટ આપી છે. અમેરિકી રાષ્ટ્રપતિએ કહ્યું, “તેઓ એક ડીલ કરવા જઈ રહ્યા છે. તેઓએ ગઈ કાલે કંઈક કર્યું જે ખરેખર અદ્ભુત હતું. તેઓએ અમને ભેટ આપી. અને તે ભેટ આજે આવી. તે એક મોટી ભેટ હતી, જેની કિંમત ઘણી છે.”
જોકે, ટ્રમ્પે એ નથી જણાવ્યું કે આ ભેટ શું છે. તેણે કહ્યું, “હું તમને તે ભેટ શું છે તે જણાવવાનો નથી, પરંતુ તે એક મોટી વસ્તુ હતી. અને તેઓએ તે અમને આપી. તેથી મારા માટે તેનો અર્થ માત્ર એક જ હતો – અમે યોગ્ય લોકો સાથે વાત કરી રહ્યા હતા. ના, તે પરમાણુ શસ્ત્રો ન હતા. તે તેલ અને ગેસ હતા.”
