યુક્રેનના રાષ્ટ્રપતિ વોલોડીમિર ઝેલેન્સ્કીએ મોટો દાવો કરતા કહ્યું છે કે રશિયાએ હુમલાના થોડા સમય પહેલા જ સાઉદી અરેબિયામાં સ્થિત અમેરિકી સૈન્ય મથકના સેટેલાઇટ ફોટા ઘણા વખત લીધા હતા અને આ માહિતી ઈરાન સાથે શેર કરવામાં આવી હશે. આ દાવાએ પહેલાથી જ તંગ આંતરરાષ્ટ્રીય વાતાવરણને વધુ વકર્યું છે. ઝેલેન્સકીના જણાવ્યા અનુસાર, યુક્રેનની ગુપ્તચર એજન્સીઓ દ્વારા તૈયાર કરવામાં આવેલા રિપોર્ટમાં જાણવા મળ્યું છે કે રશિયન સેટેલાઇટે 20 માર્ચ, 23 માર્ચ અને 25 માર્ચના રોજ પ્રિન્સ સુલતાન એરબેઝની તસવીરો લીધી હતી. તેના એક દિવસ બાદ 26 માર્ચે ઈરાને આ એરબેઝ પર હુમલો કર્યો હતો.
આ હુમલામાં ઈરાને છ બેલેસ્ટિક મિસાઈલ અને 29 ડ્રોન છોડ્યા હોવાના અહેવાલ છે. આ હુમલામાં ઓછામાં ઓછા 15 જવાનો ઘાયલ થયા છે, જેમાંથી ઘણાની હાલત નાજુક હોવાનું કહેવાય છે. આ એરબેઝ અમેરિકા અને સાઉદી અરેબિયા બંનેની સેના માટે એક મહત્વપૂર્ણ વ્યૂહાત્મક આધાર છે.
ઝેલેન્સકીએ કહ્યું કે યુક્રેનના અનુભવ મુજબ, રશિયા દ્વારા સ્થાનનું વારંવાર સેટેલાઇટ ઇમેજિંગ સંભવિત હુમલાનો સંકેત છે. તેણે કહ્યું, “જો તેઓ તૈયારી કર્યા પછી એક ચિત્ર લે છે, જો તેઓ તેને બીજી વખત લે છે તો તે એક પ્રેક્ટિસ જેવું છે અને ત્રીજી વખત તેનો અર્થ એ કે હુમલો એક કે બે દિવસમાં થઈ શકે છે.”
