ચીનના બેઈજિંગમાં શુક્રવારે સાંજે રાજધાનીની સૌથી ઊંચી ગગનચુંબી ઈમારત સાથે એક નાનું પ્લેન અથડાયું હતું, જેના કારણે ખળભળાટ મચી ગયો હતો. સેન્ટ્રલ બિઝનેસ ડિસ્ટ્રિક્ટ (CBD)ના 109 માળના ચાઇના જુન ટાવર સાથે વિમાન સ્થાનિક સમય અનુસાર સાંજે 6 વાગ્યે અથડાયું હતું. ટક્કર એટલી જોરદાર હતી કે બિલ્ડિંગની બે બારીના કાચ તૂટી ગયા હતા અને પ્લેનના ઘણા ભાગો નીચે રોડ પર પડ્યા હતા. ઘટના બાદ તુરંત સાવચેતીના પગલા તરીકે ઈમારતને ખાલી કરાવવામાં આવી હતી અને ઈમરજન્સી સેવાઓને આસપાસના વિસ્તારમાં તૈનાત કરવામાં આવી હતી.
પ્રત્યક્ષદર્શીઓ દ્વારા શેર કરવામાં આવેલા વિડિયોમાં વિમાનની અથડામણનો કાટમાળ જમીન પર પડતો અને બિલ્ડિંગના નીચેના ભાગમાંથી ધુમાડો નીકળતો જોઈ શકાય છે. પ્રારંભિક અહેવાલો અનુસાર વિમાન સંપૂર્ણ રીતે ક્ષતિગ્રસ્ત થયું છે. એરક્રાફ્ટ B-12PP મોડલનું હતું અને શિફોસી એરપોર્ટ પરથી ટેકઓફ કર્યા પછી લગભગ 30 મિનિટ પછી બેઇજિંગના પૂર્વ ફિફ્થ રિંગ રોડ નજીક રડારથી ખોવાઈ ગયું હતું. આના થોડા સમય પછી, તે ટાવર સાથે અથડાવાની માહિતી પ્રકાશમાં આવી.
1700 ફૂટ ઉંચી ઈમારત સાથે અથડામણ
CITIC ટાવર, જેને ચાઇના જૂન તરીકે પણ ઓળખવામાં આવે છે, તે લગભગ 1700 ફૂટ ઊંચું છે. તે બેઇજિંગની સૌથી ઊંચી ઇમારત માનવામાં આવે છે. દુર્ઘટના બાદ ફાયર બ્રિગેડ અને રેસ્ક્યુ ટીમ તાત્કાલિક ઘટનાસ્થળે પહોંચી ગઈ હતી. સમગ્ર સંકુલને સુરક્ષાના ઘેરામાં લેવામાં આવ્યું હતું. હાલમાં અધિકારીઓએ મૃત કે ઘાયલોની સંખ્યાની સત્તાવાર પુષ્ટિ કરી નથી. તપાસ એજન્સીઓ અકસ્માતનું કારણ શોધવામાં વ્યસ્ત છે. એ પણ જોવામાં આવી રહ્યું છે કે આ દુર્ઘટના પાછળ પ્લેનમાં કોઈ ટેકનિકલ ખામી હતી કે અન્ય કોઈ કારણ હતું.
