બાંગ્લાદેશ ક્રિકેટ બોર્ડ માટે આ નિર્ણયની ક્ષણ છે. ગુરુવારે તે સંપૂર્ણ રીતે સ્પષ્ટ થઈ જશે કે તેની ટીમ T20 વર્લ્ડ કપમાં રમી શકશે કે નહીં. ભારતમાં મેચોને લઈને બાંગ્લાદેશની ‘સુરક્ષાની ચિંતાઓ’ને પાયાવિહોણી ગણાવીને ICC દ્વારા આપવામાં આવેલ 24 કલાકનો સમયગાળો સમાપ્ત થવા જઈ રહ્યો છે. બીસીબીએ જણાવવું પડશે કે તેની ટીમ ભારતમાં રમવા માટે તૈયાર છે કે નહીં. વર્લ્ડકપમાં રમવું હોય તો ભારતમાં રમવું પડશે, હવે બીજો કોઈ વિકલ્પ બચ્યો નથી. જો બાંગ્લાદેશ ભારત ન આવવાનો નિર્ણય કરે છે તો સ્કોટલેન્ડની ટીમ વર્લ્ડ કપમાં તેની જગ્યા લેવા તૈયાર છે.
ICCની સમયમર્યાદાનું કાઉન્ટડાઉન ચાલી રહ્યું છે અને BCB હજુ સુધી કોઈ નિર્ણય લઈ શક્યું નથી. BCB અને સરકારી અધિકારીઓએ ખેલાડીઓનો સંપર્ક કરવાનો નિર્ણય લીધો છે. ખેલાડીઓ ચોક્કસપણે વર્લ્ડ કપ રમવા માંગે છે. BCB પણ એવું જ ઈચ્છશે પરંતુ જો બાંગ્લાદેશ સરકાર તેના સ્ટેન્ડમાંથી પાછળ નહીં હટે તો બાંગ્લાદેશી ખેલાડીઓ વર્લ્ડ કપ રમવાથી વંચિત રહી જશે. ખેલાડીઓ સાથે મસલત કર્યા બાદ બાંગ્લાદેશ ઔપચારિક રીતે ICCને તેના નિર્ણયની જાણ કરી શકે છે.
અત્યાર સુધી શું થયું?
ઇન્ટરનેશનલ ક્રિકેટ કાઉન્સિલ (ICC) એ બુધવારે બાંગ્લાદેશ ક્રિકેટ બોર્ડ (BCB)ની ટી20 વર્લ્ડ કપની મેચો શ્રીલંકામાં શિફ્ટ કરવાની વિનંતીને ફગાવી દીધી હતી. ICC એ સ્પષ્ટ કર્યું કે મેચો નિર્ધારિત પ્રમાણે આગળ વધશે કારણ કે ભારતના કોઈપણ ટૂર્નામેન્ટ સ્થળો પર બાંગ્લાદેશના ખેલાડીઓ, અધિકારીઓ અથવા ચાહકોની સુરક્ષા માટે કોઈ વિશ્વસનીય ખતરો નથી.
વીડિયો કોન્ફરન્સ દ્વારા આયોજિત ICC બોર્ડની બેઠકમાં આ નિર્ણય લેવામાં આવ્યો હતો, જેને BCBએ ભારતમાં રમવા અંગે ચિંતા વ્યક્ત કર્યા બાદ અને સ્થળો બદલવાની માંગણી કર્યા બાદ પરિસ્થિતિ અંગે ચર્ચા કરવા બોલાવવામાં આવી હતી.
