ઓલા, ઉબેર અને રેપિડો જેવી એપ-આધારિત કેબ સેવાઓ 7 ફેબ્રુઆરીએ બંધ રહી શકે છે. આ કંપનીઓ સાથે સંકળાયેલા ડ્રાઈવરોના યુનિયને દેશવ્યાપી હડતાળનું આહ્વાન કર્યું છે. ડ્રાઈવર્સ યુનિયને આ હડતાલને ઓલ ઈન્ડિયા બ્રેકડાઉન નામ આપ્યું છે. હડતાળની જાહેરાતની સાથે જ યુનિયને સરકાર પાસે તાત્કાલિક પગલાં લેવાની માગણી કરી છે અને કહ્યું છે કે એગ્રીગેટર કંપનીઓ સતત નફો કમાઈ રહી છે, જ્યારે આ પ્રક્રિયા દ્વારા ડ્રાઈવરોનું શોષણ થઈ રહ્યું છે.
સોશિયલ મીડિયા સાઈટ પર હડતાળની જાહેરાત સાથે આ યુનિયને અન્ય મજૂર સંગઠનોને પણ આ હડતાળને સમર્થન આપવા હાકલ કરી છે.
હડતાલનું કારણ શું?
સંઘે કેન્દ્રીય માર્ગ પરિવહન મંત્રી નીતિન ગડકરીને લખેલ પત્ર પણ સોશિયલ મીડિયા પર શેર કર્યો છે. પત્ર મુજબ, સરકાર દ્વારા ફરજિયાત ભાડા માળખાની ગેરહાજરીમાં, ઓલા, ઉબેર, રેપિડો, પોર્ટર અને અન્ય એગ્રીગેટર પ્લેટફોર્મ ઓટો, કેબ અને બાઇક-ટેક્સી સેવાઓ માટે એકપક્ષીય રીતે ભાડા નક્કી કરે છે. આનાથી આવકની ગંભીર અસુરક્ષા, શોષણ અને અસ્થિર કામ કરવાની પરિસ્થિતિઓ ઊભી થઈ રહી છે જે લાખો ડ્રાઈવરો માટે અસહ્ય બની ગઈ છે.
મુખ્ય માંગણીઓ?
પત્રમાં, યુનિયને મોટર વ્હીકલ એગ્રીગેટર માર્ગદર્શિકા 2005 નો ઉલ્લેખ કર્યો હતો. તે મુજબ, તેઓએ નિયમનકારી દેખરેખ, ભાડામાં પારદર્શિતા અને ડ્રાઇવરોની આજીવિકાના રક્ષણની માંગ કરી હતી. યુનિયને કહ્યું કે આ માર્ગદર્શિકાનો તાત્કાલિક અમલ થવો જોઈએ અને કેન્દ્ર અને રાજ્ય સરકારોએ એપ-આધારિત સેવાઓ માટે લઘુત્તમ ભાડું નક્કી કરવું જોઈએ. આ ભાડું નક્કી કરતા પહેલા ડ્રાઈવર યુનિયનો સાથે પણ વાત કરવી જોઈએ. આ સિવાય યુનિયને આ કેબ સેવાઓમાં ખાનગી વાહનોના ઉપયોગ પર પ્રતિબંધ મૂકવાની પણ માંગ કરી હતી.
