પાકિસ્તાન ક્રિકેટ ટીમે T20 વર્લ્ડ કપમાં સારી શરૂઆત કરી છે. T20 વર્લ્ડ કપની પહેલી જ મેચમાં પાકિસ્તાને નેધરલેન્ડને છેલ્લી ઓવર સુધી રમાયેલી મેચમાં ત્રણ વિકેટે હરાવ્યું હતું. કોલંબોમાં રમાયેલી મેચમાં નેધરલેન્ડે પ્રથમ બેટિંગ કરીને 19.5 ઓવરમાં તમામ વિકેટ ગુમાવીને 147 રન બનાવ્યા હતા. જવાબમાં પાકિસ્તાનના બેટ્સમેનો અપેક્ષા મુજબનું પ્રદર્શન કરી શક્યા નહોતા અને વારંવારના અંતરે વિકેટ ગુમાવી હતી. જો કે છેલ્લી ઓવરોમાં ફહીમ અશરફે કેટલાક મોટા શોટ ફટકારીને ટીમને મેચમાં પરત લાવી દીધી હતી અને ત્રણ બોલ બાકી રહેતા મેચ જીતી લીધી હતી. પાકિસ્તાનની ટીમે 19.3 ઓવરમાં 7 વિકેટે 148 રન બનાવીને મેચ જીતી લીધી હતી. પાકિસ્તાન તરફથી શાહિબજાદા ફરહાને 47 રનની ઇનિંગ રમી હતી. નેધરલેન્ડ તરફથી મિકરન અને આર્યનને 2-2 વિકેટ મળી હતી.
148 રનના ટાર્ગેટનો પીછો કરવા ઉતરેલી પાકિસ્તાનની ટીમને સૈમ અયુબ અને સાહિબજાદાએ સારી શરૂઆત અપાવી હતી. બંને વચ્ચે પ્રથમ વિકેટ માટે 27 રનની ભાગીદારી થઈ હતી. અયુબે 13 બોલમાં 24 રન બનાવ્યા હતા. કેપ્ટન સલમાન અલી આગા લાંબો સમય ક્રિઝ પર ટકી શક્યો નહોતો અને 8 બોલમાં 12 રન બનાવીને આઉટ થયો હતો. ઓપનર સાહિબજાદા ફરહાને 31 બોલમાં 47 રનની ઇનિંગ રમી હતી. ઉસ્માન ખાન ખાતું ખોલાવી શક્યો નહોતો. સિનિયર બેટ્સમેન બાબર આઝમે 18 બોલમાં 15 રનનું યોગદાન આપ્યું હતું. મોહમ્મદ નવાઝ 13 બોલમાં માત્ર 6 રન બનાવી શક્યો હતો. શાદાબ ખાને 12 બોલમાં 8 રનની ઇનિંગ રમી હતી. ફહીમ અશરફ 11 બોલમાં 29 રન બનાવીને અણનમ પરત ફર્યો હતો. શાહીન આફ્રિદીએ 9 બોલમાં 5 રનનું યોગદાન આપ્યું હતું.
પાકિસ્તાનની ટીમ એક સમયે મેચ હારવાની ખૂબ નજીક હતી. 148 રનના ટાર્ગેટનો પીછો કરવા ઉતરેલી ટીમે 17 ઓવરમાં 115ના સ્કોર પર 7 વિકેટ ગુમાવી દીધી હતી. પાકિસ્તાનને જીતવા માટે 18 બોલમાં 33 રનની જરૂર હતી. 18મી ઓવરમાં માત્ર ચાર રન જ બન્યા હતા, ત્યારબાદ પાકિસ્તાનને છેલ્લી બે ઓવરમાં જીતવા માટે 12 બોલમાં 29 રનની જરૂર હતી. લોગાનની આ ઓવરમાં ફહીમ અશરફે પહેલા, ત્રીજા અને પાંચમા બોલ પર સિક્સર ફટકારી અને છેલ્લા બોલ પર બોલ બેટ સાથે અથડાઈને બાઉન્ડ્રી પાર કરી ગયો. આ ઓવરમાં કુલ 24 રન થયા હતા, જેના કારણે પાકિસ્તાનને જીતવા માટે છેલ્લી ઓવરમાં 6 બોલમાં માત્ર 5 રનની જરૂર હતી. ફહીમે મેચની છેલ્લી ઓવરના ત્રીજા બોલ પર ચોગ્ગો ફટકારીને ટીમને જીત અપાવી હતી.
નેધરલેન્ડ તરફથી આર્યન દત્ત અને પોલ વાન મીકેરેને બે-બે વિકેટ લીધી હતી. લોગાન વાન બીક, કાયલ ક્લેઈન અને રોલોફ વાન ડેર મર્વેએ એક-એક બેટ્સમેનને આઉટ કર્યા હતા.
આ પહેલા પાકિસ્તાને ટોસ જીતીને બોલિંગ કરવાનો નિર્ણય લીધો હતો. બેટિંગ કરવા આવેલી નેધરલેન્ડની ટીમ પાકિસ્તાની બોલિંગ આક્રમણ સામે 19.5 ઓવરમાં 147 રનમાં ઓલઆઉટ થઈ ગઈ હતી. કેપ્ટન સ્કોટ એડવર્ડ્સે 29 બોલમાં 29 રન (37), બાસ ડેલિડેએ 25 બોલમાં (30), માઈકલ લેવિટે 15 બોલમાં (24), કોલિન એકરમેને 14 બોલમાં (20) અને આર્યન દત્તે 13 બોલમાં 13 રન બનાવ્યા હતા. પાકિસ્તાનના બોલિંગ આક્રમણ સામે નેધરલેન્ડના છ બેટ્સમેન ડબલ ફિગર સુધી પહોંચી શક્યા ન હતા. પાકિસ્તાન તરફથી સલમાન મિર્ઝાએ ત્રણ વિકેટ ઝડપી હતી. મોહમ્મદ નવાઝ, અબરાર અહેમદ અને સામ અયુબને બે-બે વિકેટ મળી હતી. શાહીન શાહ આફ્રિદીએ એક બેટ્સમેનને આઉટ કર્યો હતો.
