ગયા મે મહિનામાં યુદ્ધના મેદાનમાં ભારતથી ખરાબ રીતે પરાજય પામેલા પાકિસ્તાને હવે ચોરીનો આશરો લીધો છે. પોતાની એર ડિફેન્સ સિસ્ટમની નિષ્ફળતા બાદ પાકિસ્તાન રશિયામાં ઘૂસીને ડિફેન્સ ટેક્નોલોજી ચોરી કરવાનો પ્રયાસ કરી રહ્યું હતું. તાજેતરમાં એક રિપોર્ટમાં આ વાત સામે આવી છે. રિપોર્ટ અનુસાર, રશિયાએ તાજેતરમાં પાકિસ્તાનની ઈન્ટર-સર્વિસિસ ઈન્ટેલિજન્સ (ISI) દ્વારા ચલાવવામાં આવતા જાસૂસી નેટવર્કનો પર્દાફાશ કર્યો છે. આ નેટવર્ક રશિયા પાસેથી એર ડિફેન્સ સિસ્ટમની ટેક્નોલોજીની દાણચોરી કરવાનો પ્રયાસ કરી રહ્યું હતું.
ઇકોનોમિક ટાઇમ્સના એક અહેવાલમાં આ બાબતથી પરિચિત લોકોના હવાલાથી કહેવામાં આવ્યું છે કે રશિયામાં એક ઓપરેશનના ભાગ રૂપે કેટલાક ગુપ્ત માહિતી દસ્તાવેજોની દાણચોરી કરતા એક રશિયન નાગરિકની સેન્ટ પીટર્સબર્ગમાં ધરપકડ કરવામાં આવી હતી. આ દસ્તાવેજોમાં લશ્કરી હેલિકોપ્ટરની ટેક્નોલોજી અને હવાઈ સંરક્ષણ પ્રણાલી વિકસાવવા માટે ઉપયોગમાં લેવાતા દસ્તાવેજો સંબંધિત ઘણી માહિતીનો સમાવેશ થાય છે. ISI કથિત રીતે રશિયા દ્વારા ઉત્પાદિત અદ્યતન એર ડિફેન્સ સિસ્ટમ્સ સંબંધિત ટેક્નોલોજીની દાણચોરી કરવાનો પ્રયાસ કરી રહી હતી.
ઉલ્લેખનીય છે કે રશિયામાં પાકિસ્તાનની આ કાર્યવાહી ઓપરેશન સિંદૂરના થોડા મહિના બાદ સામે આવી હતી. ઓપરેશન સિંદૂર અને ત્યારબાદ પાકિસ્તાન સામે યુદ્ધ જેવી પરિસ્થિતિમાં ભારતે સ્વદેશી હવાઈ સંરક્ષણ પ્રણાલીની સાથે રશિયામાં બનેલી S400 એર ડિફેન્સ સિસ્ટમની મદદથી પાકિસ્તાનની સ્થિતિ નબળી પાડી હતી. આ સંરક્ષણ પ્રણાલીઓએ પાકિસ્તાનના કાયરતાપૂર્ણ હુમલાઓને સંપૂર્ણપણે નિષ્ફળ બનાવ્યા હતા. આવી સ્થિતિમાં હવે પાકિસ્તાને આ ટેક્નોલોજીની ચોરીનો આશરો લીધો છે.
