અમેરિકાના બટલરમાં એક નાનું પ્લેન ક્રેશ થયું છે, જેમાં 12 લોકોના મોતની આશંકા છે. સ્થાનિક અધિકારીઓના જણાવ્યા અનુસાર, પ્લેન ટેકઓફના થોડા સમય બાદ દુર્ઘટનાગ્રસ્ત થયું હતું. રાહત અને બચાવ ટુકડીઓ તાત્કાલિક ઘટનાસ્થળે પહોંચી ગઈ હતી અને કાટમાળમાંથી લોકોને બહાર કાઢવાનું કામ શરૂ કરી દેવામાં આવ્યું હતું. અકસ્માતનું કારણ હજુ સુધી જાણી શકાયું નથી, પરંતુ ફેડરલ તપાસ એજન્સીઓએ આ મામલે તપાસ શરૂ કરી દીધી છે. અધિકારીઓનું કહેવું છે કે હવામાન, ટેકનિકલ નિષ્ફળતા કે અન્ય સંભવિત કારણોની તપાસ કરવામાં આવી રહી છે.
ઈમરજન્સી સર્વિસને જાણ કરવામાં આવી હતી કે એક પ્લેન જમીન પર પડી ગયું હતું અને આગની લપેટમાં આવી ગયું હતું. મિઝોરી સ્ટેટ હાઈવે પેટ્રોલના સાર્જન્ટ જસ્ટિન ઈવિંગે જણાવ્યું હતું કે વિમાન એરપોર્ટ નજીકના એક મેદાનમાં પડ્યું હતું. અકસ્માત બાદ પોલીસ, હાઈવે પેટ્રોલિંગ અને સ્થાનિક પ્રશાસન ઘટનાસ્થળે પહોંચીને રાહત કાર્ય શરૂ કર્યું હતું. સુરક્ષાને ધ્યાનમાં રાખીને આસપાસનો રસ્તો પણ બંધ કરી દેવામાં આવ્યો હતો. બટલર શહેર કેન્સાસ સિટીથી લગભગ 65 માઇલ દક્ષિણમાં આવેલું છે.
