વેસ્ટ ઈન્ડિઝના સ્ટાર ફાસ્ટ બોલર રોમારિયો શેફર્ડે શનિવારે સ્કોટલેન્ડ સામેની મેચમાં હેટ્રિક લીધી હતી. વેસ્ટ ઈન્ડિઝના શેફર્ડે 17મી ઓવરમાં આ સિદ્ધિ મેળવી હતી. આ સાથે, તે T20 વર્લ્ડ કપ 2026માં હેટ્રિક લેનારો પ્રથમ બોલર બની ગયો છે. કોલકાતાના ઈડન ગાર્ડન્સમાં રમાયેલી આ મેચમાં વેસ્ટ ઈન્ડિઝના સ્ટાર ઓલરાઉન્ડરે માત્ર હેટ્રિક જ નહી પરંતુ 5 વિકેટ લઈને સ્કોટલેન્ડની બેટિંગની કમર પણ તોડી નાખી હતી. રોમારિયો શેફર્ડે 17મી ઓવરમાં સતત ત્રણ બોલમાં મેથ્યુ ક્રોસ, માઈકલ લીસ્ક અને ઓલિવર ડેવિડસનને આઉટ કરીને T20 વર્લ્ડ કપ 2026ની પ્રથમ હેટ્રિક પૂરી કરી. આ જ ઓવરના છેલ્લા બોલ પર તેણે વિકેટ પણ લીધી હતી.
183 રનના ટાર્ગેટનો પીછો કરતા સ્કોટલેન્ડની શરૂઆત સારી રહી ન હતી અને 37ના સ્કોર પર ત્રણ વિકેટ ગુમાવી દીધી હતી. માઈકલ જોન્સ (1), બ્રાન્ડોન મેકમુલન (14) અને જ્યોર્જ મુન્સે (19) રન બનાવીને આઉટ થઈ ગયા હતા. આ પછી કેપ્ટન રિચર્ડ બેરિંગ્ટન અને ટોમ બ્રુસની જોડીએ ઈનિંગની કમાન સંભાળી હતી. બંને બેટ્સમેનોએ ચોથી વિકેટ માટે 78 રન જોડ્યા હતા. જેસન હોલ્ડરે 14મી ઓવરમાં રિચર્ડ બેરિંગ્ટનને આઉટ કરીને આ ભાગીદારીનો અંત લાવ્યો હતો. રિચર્ડ બેરિંગટને 24 બોલમાં ત્રણ ચોગ્ગા અને બે છગ્ગા સાથે 42 રનની ઇનિંગ રમી હતી. તેની આગલી જ ઓવરમાં ગુડાકેશ મોતીએ ટોમ બ્રુસને એલબીડબલ્યુ આઉટ કરીને પેવેલિયન મોકલ્યો હતો. ટોમ બ્રુસે 28 બોલમાં એક ફોર અને બે સિક્સર સાથે 35 રન બનાવ્યા હતા.
આ પછી રોમારિયો શેફર્ડની બોલિંગ સામે સ્કોટલેન્ડની ઇનિંગ્સ પત્તાના ઘરની જેમ પડી ભાંગવા લાગી. 133ના સ્કોર પર સ્કોટલેન્ડે ચાર વિકેટ ગુમાવી દીધી હતી. 19મી ઓવરના પાંચમા બોલ પર જેસન હોલ્ડરે માર્ક વોટ (15)ને આઉટ કરીને 147ના સ્કોર પર સ્કોટલેન્ડની ઇનિંગ્સનો અંત આણ્યો હતો. આ સાથે વેસ્ટ ઈન્ડિઝે મેચ 35 રનથી જીતી લીધી હતી.
વેસ્ટ ઈન્ડિઝ તરફથી રોમારિયો શેફર્ડે પાંચ વિકેટ ઝડપી હતી. જેસન હોલ્ડને ત્રણ વિકેટ મળી હતી. ગુડાકેશ મોતી અને શમર જોસેફે એક-એક બેટ્સમેનને આઉટ કર્યા હતા. હેટમાયરને પ્લેયર ઓફ ધ મેચનો એવોર્ડ મળ્યો હતો
