રશિયાના રાષ્ટ્રપતિ વ્લાદિમીર પુતિને પહેલીવાર સ્વીકાર્યું છે કે યુક્રેનના હુમલાથી તેમને ભારે નુકસાન થયું છે અને પેટ્રોલ અને ડીઝલની પણ અછત સર્જાઈ છે. પુતિને ઓઈલ ઈન્સ્ટોલેશન્સની સુરક્ષાને મજબૂત કરવા અને ઈંધણનું ઉત્પાદન વધારવાનું વચન આપ્યું છે. તાજેતરના મહિનાઓમાં યુક્રેને રશિયન સૈન્ય અને ઊર્જા સુવિધાઓ પર લાંબા અંતરના ડ્રોન હુમલામાં વધારો કર્યો છે. યુક્રેનના રાષ્ટ્રપતિ વોલોડીમિર ઝેલેન્સકીએ રવિવારે ‘ટેલિગ્રામ’ પર લખ્યું કે યુક્રેનના લાંબા અંતરના ડ્રોને રશિયાની બે ઓઈલ રિફાઈનરીઓને નિશાન બનાવી છે.
પેટ્રોલ પંપ પર લાંબી કતારો
તેમણે કહ્યું, ‘દરેક હુમલો રશિયાની યુદ્ધ ક્ષમતાને નબળી બનાવવા અને શાંતિ તરફનું એક બીજું પગલું છે.’ આ હુમલાઓને કારણે રશિયામાં ઈંધણ પુરવઠો પ્રભાવિત થયો છે. ઘણા વિસ્તારોમાં પેટ્રોલની અછત અને પેટ્રોલ પંપ પર લાંબી કતારો જોવા મળી રહી છે, જેના કારણે કેટલાક વિસ્તારોમાં ઇંધણના વિતરણ પર ક્વોટા અથવા મર્યાદા પણ શરૂ કરવામાં આવી છે.
રશિયા પર વાતચીત માટે દબાણ વધ્યું
પશ્ચિમી વિશ્લેષકો માને છે કે આનાથી રશિયાના સૈન્ય અભિયાનની ગતિ પર પણ અસર પડી છે અને ક્રેમલિન પર વાતચીત માટે દબાણ વધ્યું છે. પુતિને રશિયન રાજ્ય ટેલિવિઝન પર જણાવ્યું હતું કે યુક્રેનનો ઉદ્દેશ્ય રશિયન સમાજમાં ભાગલા પાડવાનો હતો અને રશિયાને તેની સૈન્ય પ્રગતિ અટકાવવા દબાણ કરે છે. જોકે, તેમણે દાવો કર્યો હતો કે આ હુમલાઓની યુદ્ધ મોરચે કોઈ અસર થઈ નથી.
તેમણે એમ પણ કહ્યું કે યુક્રેને બંને દેશોના આંતરિક વિસ્તારો પર હુમલા રોકવા અને લડાઈને માત્ર ડોનેસ્ક, લુહાન્સ્ક, ખેરસન અને ઝાપોરિઝિયા વિસ્તારો સુધી મર્યાદિત રાખવાનો પ્રસ્તાવ મૂક્યો હતો, પરંતુ રશિયાએ આ વાતને નકારી કાઢી હતી. તે જ સમયે, યુક્રેનિયન ડ્રોનના કાટમાળમાં રશિયાના ક્રાસ્નોદર પ્રદેશમાં સ્લેવ્યાન્સ્ક-ના-કુબાની સ્થિત એક મોટી ઓઇલ રિફાઇનરીમાં આગ લાગી હતી. આ ઘટનામાં એક વ્યક્તિનું મોત નીપજ્યું હતું અને અન્ય ઘાયલ થયો હતો. સ્થાનિક અધિકારીઓએ આ માહિતી આપી.
ઝેલેન્સકીએ એવો પણ દાવો કર્યો હતો કે યારોસ્લાવલ પ્રદેશમાં અન્ય એક રિફાઈનરીને પણ નિશાન બનાવવામાં આવી હતી, જોકે રશિયાએ આ વાતની પુષ્ટિ કરી નથી. બળતણની સ્થિતિની સમીક્ષા કરવા અધિકારીઓ સાથેની બેઠકમાં, પુતિને સ્વીકાર્યું કે દેશ ‘મુશ્કેલ સમયગાળામાંથી પસાર થઈ રહ્યો છે’, પરંતુ ભારપૂર્વક જણાવ્યું કે મોસ્કો તેની તમામ સામાજિક જવાબદારીઓનું સંપૂર્ણ પાલન કરશે.
