પાકિસ્તાને સાત વર્ષ બાદ ઓસ્ટ્રેલિયાને T20 ઈન્ટરનેશનલમાં હરાવ્યું છે. પાકિસ્તાને ગુરુવારે લાહોરમાં રમાયેલી પ્રથમ T20 મેચમાં ઓસ્ટ્રેલિયાને 22 રને હરાવ્યું હતું. આ જીત પાકિસ્તાન માટે ખૂબ જ ખાસ હતી અને તેથી જ પાકિસ્તાનના વડાપ્રધાન શહેબાઝ શરીફે ટીમના પ્રદર્શનના વખાણ કર્યા છે. જો કે તેને સોશિયલ મીડિયા પર ઘણા ટ્રોલનો સામનો કરવો પડી રહ્યો છે. પૂર્વ ભારતીય ક્રિકેટર અજય જાડેજાએ પાકિસ્તાની પીએમની પોસ્ટ શેર કરતા તેને પાકિસ્તાનની નાની ખુશી ગણાવી છે.
પાકિસ્તાનની જીત બાદ, પાકિસ્તાનના વડાપ્રધાન શહેબાઝ શરીફે લખ્યું, “ટીમ પાકિસ્તાનને ઓસ્ટ્રેલિયા સામેની પ્રથમ T20 મેચમાં તેમના શાનદાર પ્રદર્શન માટે ખૂબ-ખૂબ અભિનંદન. હું પીસીબીના અધ્યક્ષ મોહસિન નકવી અને તેમની સમગ્ર ટીમને પાકિસ્તાન ક્રિકેટને મજબૂત બનાવવાના તેમના અથાક પ્રયાસો માટે પણ બિરદાવું છું. આ રાષ્ટ્ર માટે ગર્વની ક્ષણ છે.
અજય જાડેજા ટ્રોલ થયા
પાકિસ્તાનના વડાપ્રધાનના ટ્વીટ પર અજય જાડેજાએ લખ્યું કે, પાકિસ્તાનીઓની નાની ખુશી. હું પહેલીવાર જોઉં છું કે કોઈ વડાપ્રધાન દ્વિપક્ષીય શ્રેણીમાં પ્રથમ મેચ જીત્યા બાદ ટ્વીટ કરી રહ્યા છે.” અગાઉ આકાશ ચોપરાએ પણ ટ્વીટ કરીને લખ્યું હતું કે પાકિસ્તાનની ટીમે ઓસ્ટ્રેલિયાની B ટીમને હરાવી છે અને તે પણ 170 રનની મેચમાં 20 રનથી જીતીને શાનદાર કહી શકાય નહીં.
