રશિયા અને યુક્રેન વચ્ચે ચાલી રહેલા યુદ્ધમાં ઉત્તર કોરિયાના સૈનિકોની હાજરી એક સમયે હેડલાઈન્સ બની હતી. હવે તેમના સરમુખત્યારે આ સૈનિકો વિશે ખુલાસો કર્યો છે કે કેવી રીતે તેઓએ યુદ્ધના મેદાનમાં સૌથી મુશ્કેલ કામ કર્યું. સરમુખત્યાર કિમના કહેવા પ્રમાણે, આ વર્ષની શરૂઆતમાં કુર્સ્ક ક્ષેત્રમાં મોકલવામાં આવેલા ઉત્તર કોરિયાના સૈનિકોએ અહીં લેન્ડમાઈન હટાવવાનું કામ કર્યું હતું, જેના કારણે હજારો રશિયન સૈનિકોના જીવ બચી ગયા હતા.
શનિવારે ઉત્તર કોરિયાના રાજ્ય મીડિયા પર પ્રસારિત એક કાર્યક્રમમાં કિમ જોંગ ઉને રશિયાથી પરત ફરેલા પોતાના સૈનિકોની પ્રશંસા કરી હતી. સરમુખત્યારે કહ્યું, “ઓગસ્ટમાં શરૂ થયેલી 120 દિવસની તૈનાતી દરમિયાન, અમારા સૈનિકોએ અભૂતપૂર્વ હિંમત દર્શાવી. અધિકારીઓ હોય કે સૈનિકો, તેઓ લગભગ દરરોજ સામૂહિક બહાદુરી દર્શાવતા હતા, તેમની કલ્પના બહારના માનસિક અને શારીરિક દબાણને પાર કરતા હતા. આ લોકોએ ડિમાઈનિંગ કાર્ય દરમિયાન તેમના શહેરો અને ગામડાઓમાં પત્રો પણ મોકલ્યા હતા.”
કિમે વધુમાં કહ્યું, “ત્રણ મહિનાથી ઓછા સમયમાં, અમારા સૈનિકોએ રશિયન સેના માટે એક મોટા ખતરનાક વિસ્તારને સંપૂર્ણપણે સુરક્ષિત કરી લીધો. અમારા તમામ સૈનિકો જેમણે આમાં પોતાનો જીવ ગુમાવ્યો. રાજ્ય તેમની બહાદુરીને હંમેશ માટે અમર બનાવવાના ઉદ્દેશ્ય સાથે તેમનું સન્માન કરશે.”
સરકારી મીડિયા દ્વારા જાહેર કરવામાં આવેલા ફોટામાં કિમ સ્પષ્ટપણે પરત ફરેલા સૈનિકોને ગળે લગાવતા જોઈ શકાય છે. આમાંના કેટલાક સૈનિકો ઘાયલ અને વ્હીલ ચેર પર પણ જોવા મળ્યા હતા.
આ પહેલા ઉત્તર કોરિયા શરૂઆતથી જ પુતિનની મદદ માટે કુર્સ્ક ક્ષેત્રમાં સૈનિકો મોકલી રહ્યું છે. પશ્ચિમી ગુપ્તચર એજન્સીઓ અનુસાર, ઉત્તર કોરિયાએ આ યુદ્ધમાં હજારો સૈનિકો મોકલ્યા છે. બદલામાં, રશિયા તેને નાણાકીય સહાય, લશ્કરી ટેક્નોલોજી, ખાદ્ય ચીજવસ્તુઓ અને ઊર્જા પુરવઠામાં મદદ કરી રહ્યું છે. તેના કારણે પોતાના પરમાણુ કાર્યક્રમને કારણે અલગ પડી ગયેલા આ દેશને તેની કામગીરી ચલાવવામાં મદદ મળી રહી છે.
