અમેરિકાનું ટેક્સાસ ગયા વર્ષે એક સનસનાટીપૂર્ણ હત્યાથી હચમચી ગયું હતું. વંશીય તણાવથી ઘેરાયેલા આ હત્યા કેસમાં આખરે કોર્ટનો ચુકાદો આવી ગયો છે. કોલિન કાઉન્ટીની જ્યુરીએ 19 વર્ષીય કાર્મેલો એન્થોનીને 17 વર્ષીય ઓસ્ટિન મેટકાફની હત્યા માટે દોષી ઠેરવ્યો છે. જ્યુરીના આ નિર્ણય બાદ કોર્ટે કાર્મેલો એન્થોનીને 35 વર્ષની જેલની સજા સંભળાવી છે. ચુકાદો આવતાની સાથે જ કોર્ટની બહાર કાર્મેલોના સમર્થકો અને પોલીસ વચ્ચે હિંસા થઈ હોવાના અહેવાલ છે.
ઘટના 2 એપ્રિલ 2025ની છે. ફ્રિસ્કોના ડેવિડ કુકેન્ડલ સ્ટેડિયમમાં આંતર-શાળા રેસ ટ્રેક સ્પર્ધા ચાલી રહી હતી. ભારે વરસાદ અને વાવાઝોડાને કારણે રમત થોડીવાર માટે બંધ થઈ ગઈ હતી. મળતી માહિતી મુજબ, ઓસ્ટિન મેટકાફ ‘મેમોરિયલ હાઈસ્કૂલ’નો વિદ્યાર્થી હતો અને કાર્મેલો એન્થોની ‘સેન્ટેનિયલ હાઈસ્કૂલ’નો વિદ્યાર્થી હતો. સેન્ટેનિયલ સ્કૂલ પાસે ત્યાં તંબુ ન હોવાથી, કાર્મેલો વરસાદથી બચવા માટે મેમોરિયલ હાઈસ્કૂલ ટીમના તંબુની નીચે બેસી ગયો.
ત્યાં હાજર સાક્ષીઓના જણાવ્યા અનુસાર, ઓસ્ટિન મેટકાફ અને તેના જોડિયા ભાઈ હન્ટર મેટકાલ્ફ સહિત લગભગ 15 વિદ્યાર્થીઓએ કાર્મેલોને તેમનો તંબુ છોડવા કહ્યું. જેમ જેમ દલીલ વધી, ઓસ્ટીને કાર્મેલોને પાછળ ધકેલવાનું શરૂ કર્યું. આનાથી કાર્મેલોને ગુસ્સો આવ્યો. ગુસ્સે થઈને, કાર્મેલોએ તેની બેગમાંથી તીક્ષ્ણ છરી કાઢી અને ઓસ્ટિનની છાતીમાં છરી મારી દીધી. ઓસ્ટિન તેના જોડિયા ભાઈના હાથમાં મૃત્યુ પામ્યો.
સ્વબચાવની દલીલ નકારી કાઢી
આ મામલામાં કોર્ટની સુનાવણી સમગ્ર વિશ્વમાં ચર્ચાનો વિષય બની હતી. બચાવ પક્ષે દલીલ કરી હતી કે આરોપીએ સ્વબચાવમાં આ પગલું ભર્યું હતું. કાર્મેલોના વકીલે કોર્ટને જણાવ્યું હતું કે ઓસ્ટિન મેટકાફ શારીરિક રીતે કાર્મેલો કરતાં 50 થી 60 પાઉન્ડ ભારે અને ઊંચો હતો અને જ્યારે કાર્મેલોએ તેને ધક્કો મારવાનું શરૂ કર્યું ત્યારે તેણે પોતાનો જીવ બચાવવા સ્વ-બચાવનું કામ કર્યું હતું. સરકારી વકીલે કહ્યું કે હત્યાના ઈરાદે છરી વડે હુમલો કરવામાં આવ્યો હતો. નજ સાક્ષીની જુબાની દ્વારા સાબિત થયું હતું કે છરા માર્યા પહેલા, કાર્મેલોએ ઓસ્ટિનને ધમકી આપી હતી કે, “મને સ્પર્શ કરો અને તમે પરિણામ ભોગવશો.” ડોકટરોએ પણ કોર્ટમાં જુબાની આપી હતી કે ઘા એટલો ઊંડો હતો કે ઓસ્ટીન માટે બચવું અશક્ય હતું.
