મધ્ય પૂર્વમાં ચાલી રહેલા તણાવ વચ્ચે સ્થિતિ વધુ ગંભીર બની રહી હોય તેવું લાગી રહ્યું છે. ઈરાનના રિવોલ્યુશનરી ગાર્ડે અમેરિકાને કડક અલ્ટીમેટમ આપ્યું છે. IRGCએ કહ્યું છે કે જો તેની માંગણીઓ સંતોષવામાં નહીં આવે તો મધ્ય પૂર્વમાં સ્થિત અમેરિકન યુનિવર્સિટીઓને નિશાન બનાવવામાં આવી શકે છે. રવિવારે જારી કરાયેલા એક નિવેદનમાં IRGCએ આરોપ લગાવ્યો છે કે અમેરિકા અને ઈઝરાયેલના હુમલામાં બે ઈરાની યુનિવર્સિટીઓ નષ્ટ થઈ ગઈ છે. જેના જવાબમાં તેમણે આ કડક ચેતવણી આપી છે.
નિવેદનમાં કહેવામાં આવ્યું છે કે જો યુએસ સરકાર ઇચ્છે છે કે તેની યુનિવર્સિટીઓ આ ક્ષેત્રમાં સુરક્ષિત રહે, તો તેણે સોમવાર, 30 માર્ચ બપોરે 12 વાગ્યા સુધીમાં સત્તાવાર રીતે આ હુમલાઓની નિંદા કરવી પડશે. અન્યથા, ઈરાન બદલો લઈ શકે છે. આ ધમકી બાદ સમગ્ર વિસ્તારમાં સુરક્ષાની ચિંતા વધી ગઈ છે. મધ્ય પૂર્વમાં ઘણી અમેરિકન શૈક્ષણિક સંસ્થાઓ અને કેમ્પસ છે, જ્યાં હજારો વિદ્યાર્થીઓ અભ્યાસ કરે છે અને સ્ટાફ કામ કરે છે. આવી સ્થિતિમાં આવી ચેતવણીને ગંભીર ખતરા તરીકે જોવામાં આવી રહી છે.
