યુએસ ફેડરલ બ્યુરો ઓફ ઇન્વેસ્ટિગેશન (FBI) એ સોમવારે ગેંગસ્ટર સતીન્દરજીત સિંહ ઉર્ફે ગોલ્ડી બ્રારને 10 મોસ્ટ વોન્ટેડની યાદીમાં સામેલ કર્યો છે. તેની ધરપકડમાં મદદ કરનાર માટે 1 મિલિયન ડોલર (આશરે 10 કરોડ રૂપિયા)ના ઈનામની જાહેરાત કરવામાં આવી હતી. એફબીઆઈએ કહ્યું કે સતીન્દરજીત સિંહ લોરેન્સ બિશ્નોઈ ગેંગમાં કથિત સંડોવણી માટે વોન્ટેડ છે. એજન્સી અનુસાર, આ જૂથ કથિત રીતે દક્ષિણ કેલિફોર્નિયા તેમજ યુએસ અને કેનેડામાં વિવિધ હિંસક પ્રવૃત્તિઓમાં સામેલ છે.
એફબીઆઈના જણાવ્યા અનુસાર, ગોલ્ડી બ્રાર પર રાજકીય અને ધાર્મિક વ્યક્તિઓની કથિત હત્યા, ગોળીબાર, અપહરણ, ખંડણી, હુમલા અને ડ્રગ અને હથિયારોની હેરાફેરીમાં સામેલ હોવાનો આરોપ છે. તે અમેરિકામાં રહે છે અને ઉત્તર અમેરિકામાં આ ગેંગનો કથિત નેતા છે. કેલિફોર્નિયાના સેન્ટ્રલ ડિસ્ટ્રિક્ટની યુએસ ફેડરલ કોર્ટે 1 જુલાઈના રોજ સિંહ વિરુદ્ધ ધરપકડ વોરંટ જારી કર્યું હતું.
નિજ્જરની હત્યા કરાવવાનો આરોપ
એવો આરોપ છે કે ગોલ્ડી બ્રારે કેનેડામાં ખાલિસ્તાની આતંકવાદી હરદીપ સિંહ નિજ્જરની હત્યા કરાવી હતી. આ પછી ભારત અને કેનેડા વચ્ચે તણાવ ઘણો વધી ગયો હતો. જો કે કેનેડામાં સરકાર બદલાયા બાદ બંને દેશો વચ્ચેના સંબંધો ફરી એક વખત સ્થિર બન્યા હતા. અમેરિકાએ જુલાઇમાં નિજ્જરની હત્યા અંગે પ્રથમ ચાર્જશીટ દાખલ કરી હતી.
અમેરિકા લોરેન્સ બિશ્નોઈ ગેંગ પર તેની પકડ મજબૂત કરી રહ્યું છે
છેલ્લા કેટલાક દિવસોથી ભારતની જેલમાં બંધ લોરેન્સ બિશ્નોઈની ગેંગ પર અમેરિકા પોતાની પકડ મજબૂત કરી રહ્યું છે. અમેરિકા ઓપરેશન હાર્ડ બોલ હેઠળ ગેંગ સાથે જોડાયેલી ત્રણ આંતરરાષ્ટ્રીય ગેંગ સામે કાર્યવાહી કરી રહ્યું છે. આ ગેંગમાં સામેલ 37 લોકો સામે આરોપો લગાવવામાં આવ્યા છે અને 24 લોકોની ધરપકડ પણ કરવામાં આવી છે. જોકે અમેરિકાએ ભારત સરકારને જાણ કરી છે, RAW. NIA કે કોઈ સરકારી અધિકારી સામે કોઈ આરોપો લગાવવામાં આવ્યા નથી. અમેરિકાએ માત્ર ભારત સાથે સંકળાયેલી ગેંગના નામ આપ્યા છે.
