જર્મનીના બોચમ શહેરમાંથી એક હૃદયદ્રાવક કિસ્સો સામે આવ્યો છે. અહીં એક રહેણાંક મકાનમાં આગ લાગવાને કારણે ત્રણ ભારતીય નાગરિકો (બે મહિલા અને એક પુરુષ)ના મોત થયા છે, જ્યારે અન્ય પાંચ નાગરિકો ગંભીર રીતે ઘાયલ થયા છે. મૃતકોની ઓળખ 25 અને 27 વર્ષની બે મહિલાઓ અને 26 વર્ષની વયના એક પુરૂષ તરીકે કરવામાં આવી છે. જર્મન મીડિયા અનુસાર, પ્રાથમિક તપાસના આધારે પોલીસે આગ લગાડવાના આરોપમાં 41 વર્ષીય રોમાનિયન નાગરિકની ધરપકડ કરી છે. જો કે, આગ સ્વયંભૂ લાગી કે અન્ય કોઈના કારણે લાગી તે અંગે હજુ સુધી પુષ્ટિ થઈ નથી.
જર્મન મીડિયા અનુસાર, આ ઘટના મંગળવારે સવારે લગભગ 4.15 વાગ્યે બોચમ શહેરના હોફસ્ટેટ વિસ્તારમાં બની હતી. આ પછી ફાયર ફાઈટરની ટીમ ઘટનાસ્થળે પહોંચી ગઈ હતી. તેઓને બીજા માળે એક ફ્લેટમાં ત્રણ લોકોના મૃતદેહ મળ્યા હતા. પાંચ ઘાયલ લોકોએ ધુમાડો શ્વાસમાં લીધો હતો અને તેમને બોચુમની હોસ્પિટલોમાં લઈ જવામાં આવ્યા હતા. ટેકનિકલ ખામીના કારણે આગ લાગી હોવાની શક્યતા પોલીસે નકારી કાઢી હતી.
પૂછપરછના આધારે, પોલીસે તે જ બિલ્ડિંગમાં રહેતા 41 વર્ષીય રોમાનિયન નાગરિકની ધરપકડ કરી હતી. પોલીસે જણાવ્યું હતું કે હાલમાં એ તપાસ કરવામાં આવી રહી છે કે શું બિલ્ડિંગમાં આગ આકસ્મિક રીતે લાગી હતી કે જાણી જોઈને લાગી હતી. સ્થાનિક મીડિયાએ ત્રણેય પીડિતોના નામ અથવા ઘરના રાજ્યો અને ઘાયલોની રાષ્ટ્રીયતા જાહેર કરી નથી. હાલ રોમાનિયાના નાગરિકો પોલીસની કસ્ટડીમાં છે. તપાસકર્તાઓ આ ઘટના કેવી રીતે બની તે જાણવાનો પ્રયાસ કરી રહ્યા છે.
