નેપાળમાં આવેલા વિનાશક પૂરમાં ધોવાઈ ગયેલા મૃતદેહોમાંથી ઘરેણાં ચોરાઈ જવાનો વીડિયો વાયરલ થયો હતો. આના પર કડક કાર્યવાહી કરીને નેપાળ પોલીસે આવું કરનારાની અટકાયત કરી છે. આ અંગેની માહિતી નેપાળ પોલીસ હેડક્વાર્ટર દ્વારા એક્સ પર પોસ્ટ કરીને આપવામાં આવી છે. કહેવામાં આવ્યું છે કે મૃતદેહોમાંથી ઘરેણાંની ચોરી કરનારાઓ વિરુદ્ધ કાર્યવાહી કરવામાં આવી છે. તમને જણાવી દઈએ કે આ વીડિયો ખૂબ જ વાયરલ થઈ રહ્યો હતો. પૂરમાં મૃત્યુ પામેલી મહિલાના શરીર પરથી બે યુવકો ઘરેણાં કાઢી રહ્યા હોવાનું જોવા મળે છે. સોશિયલ મીડિયા પર આ લોકોની ખૂબ ટીકા થઈ રહી છે. લોકો તેને અમાનવીય કૃત્ય ગણાવી રહ્યા છે.
વીડિયોમાં શું છે
વાયરલ વીડિયોમાં જોવા મળી રહ્યું છે કે નેપાળમાં દુર્ઘટના બાદ એક મહિલાની લાશ ધોવાઈ ગઈ છે. આ લાશ કિનારે પડી છે. વીડિયોમાં બે યુવકો મૃતદેહની નજીક છે. તેમાંથી એક વાંસની મદદથી મૃતદેહને ઉપર તરફ ઉઠાવી રહ્યો છે. તે જ સમયે, અન્ય એક યુવક તેના કાનમાંથી ઘરેણાં કાઢી રહ્યો છે. આ દરમિયાન ઘણા લોકો ત્યાં હાજર છે, પરંતુ કોઈ તેમને રોકવાની કોશિશ કરતું નથી. ત્યાં હાજર કોઈ મૃતદેહને બહાર કાઢવાની તસ્દી પણ લેતું નથી. હાલમાં એ સ્પષ્ટ નથી થયું કે મૃતદેહ ત્યાં પહોંચવા અંગે કોઈએ અધિકારીઓને જાણ કરી હતી કે નહીં. જોકે, વીડિયો વાયરલ થયા બાદ તાત્કાલિક કાર્યવાહી કરવામાં આવી હતી.
સર્ચ ઓપરેશન ચાલુ છે
ઉલ્લેખનીય છે કે નેપાળમાં બુધવારે આવેલા વિનાશક પૂરમાં મૃતકોની સંખ્યા વધીને 359 થઈ ગઈ છે.પોલીસે આ માહિતી આપી હતી. પોલીસે ગુરુવારે જણાવ્યું હતું કે બચાવ ટીમોએ અસરગ્રસ્ત જિલ્લાઓમાંથી વધુ મૃતદેહો મેળવ્યા હોવાથી મૃત્યુઆંકમાં વધારો થયો છે. તિબેટમાંથી અચાનક આવેલા ભારે પૂરને કારણે બુધવારે મધ્ય નેપાળના ઘણા નગરો અને ગામડાઓમાં ભારે વિનાશ સર્જાયો હતો. પૂરના જોરદાર પ્રવાહને કારણે મહત્વના પુલો ધોવાઈ ગયા હતા અને લગભગ એક ડઝન હાઈડ્રોઈલેક્ટ્રિક પ્રોજેક્ટ્સ અટકી પડ્યા હતા. અનેક જિલ્લાઓમાં પૂરના પાણી ફેલાઈ ગયા છે. નેપાળ આર્મી અને અન્ય સુરક્ષા એજન્સીઓ રાસુવા, ધાડિંગ, નુવાકોટ અને ચિતવન સહિતના પૂર પ્રભાવિત જિલ્લાઓમાં શોધ અને બચાવ કામગીરી કરી રહી છે.
