પાકિસ્તાનમાં પેટ્રોલની વધતી કિંમતોને કારણે લોકો પરેશાન છે. પાકિસ્તાન તહરીક-એ-ઈન્સાફ (PTI)ના સિંધના ધારાસભ્યોએ શુક્રવારે આ મુદ્દે અનોખો વિરોધ કર્યો હતો. ધારાસભ્ય ગધેડા પર સવાર થઈને સિંધ વિધાનસભા પહોંચ્યા હતા. તેમણે કહ્યું હતું કે પેટ્રોલ એટલું મોંઘું થઈ ગયું છે કે સામાન્ય લોકો તેમજ જનપ્રતિનિધિઓ માટે રોજીંદી મુસાફરી મુશ્કેલ બની રહી છે. પીટીઆઈ નેતા સજ્જાદ અલીએ પ્રદર્શનનું નેતૃત્વ કર્યું હતું. તેઓ હાથમાં પેટ્રોલના ભાવ વધારા વિરુદ્ધનું પ્લેકાર્ડ લઈને ગધેડા પર સવાર હતા. તેમની સાથે પાર્ટીના અન્ય ધારાસભ્યો પણ પહોંચ્યા હતા અને સરકાર વિરુદ્ધ સૂત્રોચ્ચાર કર્યા હતા. ધારાસભ્યોએ પેટ્રોલના વધેલા ભાવને તાત્કાલિક પરત ખેંચવાની માંગ કરી હતી.
ધારાસભ્યો ગધેડા ગાડા પર સવાર થઈને વિધાનસભાની આસપાસના વિસ્તારોમાંથી પ્રવેશ દ્વાર સુધી પહોંચ્યા હતા. પ્રદર્શન દરમિયાન સજ્જાદ અલીએ કહ્યું કે સરકારના મંત્રીઓ અને શાસક પક્ષના ધારાસભ્યોએ પણ આ જ રીતે વિધાનસભામાં આવવું જોઈએ. તેમણે પેટ્રોલના વધતા ભાવને જનતા પર ફેંકવામાં આવી રહેલો ‘પેટ્રોલ બોમ્બ’ ગણાવ્યો હતો. તેમણે કહ્યું કે પેટ્રોલ એટલું મોંઘુ થઈ ગયું છે કે ધારાસભ્યો પોતાના વાહનમાં વિધાનસભામાં આવી શકતા નથી. આ પ્રદર્શનનો હેતુ સામાન્ય લોકોની સમસ્યાઓને આગળ લાવવાનો છે.
390.79 પાકિસ્તાની રૂપિયા પ્રતિ લિટર પેટ્રોલ
પાકિસ્તાનમાં તાજેતરમાં થયેલા વધારા બાદ પેટ્રોલની કિંમત 390.79 પાકિસ્તાની રૂપિયા પ્રતિ લીટર થઈ ગઈ છે. હાઈ-સ્પીડ ડીઝલ 424.92 રૂપિયા પ્રતિ લીટરના ભાવે વેચાઈ રહ્યું છે. આ કિંમતોમાં સરકાર દ્વારા લાદવામાં આવેલા ટેક્સ અને ટેરિફનો પણ સમાવેશ થાય છે. પેટ્રોલ પર ટેક્સ અને ટેરિફ લગભગ 114 રૂપિયા પ્રતિ લિટર છે અને ડીઝલ પર તે 100 રૂપિયા પ્રતિ લિટર છે. મધ્ય પૂર્વમાં હિંસા ફરી શરૂ થવાથી મુખ્ય તેલ પુરવઠા માર્ગોને અસર થઈ છે. તેના કારણે છેલ્લા બે મહિનામાં ઈંધણની કિંમતો પર દબાણ વધ્યું છે.
