અમેરિકાના રાષ્ટ્રપતિ ડોનાલ્ડ ટ્રમ્પે નેપાળમાં આવેલા ભીષણ પૂર પર પ્રતિક્રિયા આપી છે. ડોનાલ્ડ ટ્રમ્પે ગુરુવારે આ વિનાશને ખૂબ જ ખતરનાક ગણાવ્યો હતો. આ સાથે તેમણે એમ પણ કહ્યું કે અમેરિકા કોઈપણ પ્રકારની મદદ કરવા તૈયાર છે. ઓવલ ઓફિસમાં મીડિયા સાથે વાત કરતા ટ્રમ્પે કહ્યું કે અમેરિકાએ નેપાળનો સંપર્ક કર્યો છે. તેમણે કહ્યું કે અમે તેમને મદદ મોકલી રહ્યા છીએ. ભવિષ્યમાં પણ તેમને જે પણ મદદની જરૂર પડશે તે પૂરી પાડવામાં આવશે તેમ પણ જણાવાયું હતું.
90 અમેરિકનો ગુમ
ડોનાલ્ડ ટ્રમ્પનું આ નિવેદન એવા સમયે આવ્યું છે જ્યારે યુએસ સ્ટેટ ડિપાર્ટમેન્ટે કહ્યું કે દુર્ઘટના બાદ 90 અમેરિકનો લાપતા છે. ત્રણ અમેરિકનોનો બચાવ થયો હતો. હાલમાં યુએસ સ્ટેટ ડિપાર્ટમેન્ટે કહ્યું કે તેઓને કોઈ અમેરિકનના મોતની જાણ નથી. વિદેશ વિભાગના પ્રવક્તાએ કહ્યું કે અમે હાલમાં 90 અમેરિકનોને ટ્રેક કરી રહ્યા છીએ. આ લોકો પૂરથી પ્રભાવિત થઈ શકે છે. આ હજુ સુધી શોધાયા નથી. વિભાગે બુધવારે જણાવ્યું હતું કે તે આ વિસ્તારમાં આપત્તિ પ્રતિભાવ સલાહકાર મોકલી રહ્યું છે અને $5 મિલિયનની સહાય પણ આપી રહ્યું છે. બુધવારના પૂર અને ભૂસ્ખલન બાદ કાટમાળથી ભરેલી ખીણો અને ટેકરીઓમાં શોધ અને બચાવ કામગીરી હજુ પણ ચાલુ છે.
અત્યાર સુધીમાં કેટલા લોકોના મોત થયા છે?
તમને જણાવી દઈએ કે નેપાળ અને તિબેટમાં અચાનક આવેલા પૂરમાં ગુરૂવારે મૃત્યુઆંક વધીને 392 થઈ ગયો છે. દરમિયાન, બચાવ કાર્યકરો 290 ભારતીય નાગરિકો સહિત સેંકડો ગુમ થયેલા લોકોને શોધવા માટે યુદ્ધના ધોરણે કામ કરી રહ્યા છે. મૃત્યુમાંથી 389 લોકો નેપાળમાં અચાનક પૂરમાં મૃત્યુ પામ્યા હતા, જ્યારે ત્રણ લોકો પડોશી તિબેટમાં મૃત્યુ પામ્યા હતા. નેપાળ પોલીસના એક નિવેદનમાં કહેવામાં આવ્યું છે કે અત્યાર સુધીમાં 50 વિદેશીઓ સહિત 796 લોકોને હેલિકોપ્ટર દ્વારા અસરગ્રસ્ત વિસ્તારોમાંથી બચાવી લેવામાં આવ્યા છે, જ્યારે અન્ય 796 લોકોને રસ્તા દ્વારા બહાર કાઢવામાં આવ્યા છે. જોકે, નિવેદનમાં વિદેશી નાગરિકોની રાષ્ટ્રીયતાનો ઉલ્લેખ કરવામાં આવ્યો નથી. નિવેદનમાં કહેવામાં આવ્યું છે કે નેપાળમાં પૂરના કારણે મૃત્યુઆંક વધીને 389 થઈ ગયો છે.
કેવી રીતે થયો અકસ્માત?
નોંધનીય છે કે નેપાળ-તિબેટ બોર્ડર પાસે ગ્લેશિયર તૂટવાને કારણે ખડકો ખસી ગયા અને હિમપ્રપાત થયો. જેના કારણે બુધવારે પાણી, કાદવ અને કાટમાળનો જોરદાર પ્રવાહ મધ્ય નેપાળ તરફ આવ્યો હતો. આના કારણે, ઘણા શહેરો અને ગામડાઓ નાશ પામ્યા હતા, ઘરો, વાહનો, રસ્તાઓ અને પુલો ધોવાઇ ગયા હતા અને હાઇડ્રોઇલેક્ટ્રિક પ્રોજેક્ટ્સને નુકસાન થયું હતું. ભોટે કોશી નદી પ્રણાલીના ઉદ્ગમ સ્થાન પાસે નવું અવરોધક તળાવ બનતાં ફરીથી નીચાણવાળા વિસ્તારોમાં પૂરનો ભય છે. સત્તાવાળાઓએ ચેતવણી આપી છે કે જો આ કુદરતી અવરોધ તૂટી જાય છે, તો નદી અને તેના ડાઉનસ્ટ્રીમ વિસ્તારોમાં પાણીનો બીજો ઉછાળો આવી શકે છે.
