જાણે ગુજરાત રાજ્યમાં જમીન માફિયાઓને છૂટો હાથ મળી ગયો હોય, તેઓ કોઈ પણ જાતના ડર વગર દિવસેને દિવસે ખનીજ ચોરી કરી રહ્યા છે, ત્યારે ચાણસ્મા તાલુકાના પલાસર ગામમાં ખનીજ ચોરીની વધુ એક ઘટના બની છે. જેમાં ગ્રામજનોએ ખનીજ ચોરી કરતા બે ટ્રેક્ટર ચાલકોને પકડી પાડી પાટણ ખાણ અને ખનીજ વિભાગને જાણ કરતા ખાણ અને ખનીજ વિભાગની ટીમ ઘટના સ્થળે પહોંચી બંનેને દંડ ફટકાર્યો હતો.
પ્રાપ્ત માહિતી અનુસાર ચાણસ્મા તાલુકાના પલાસર ગામે નદીના પટમાંથી ટ્રેક્ટર ચાલક કિશનકુમાર વિષ્ણુભાઈ વણજારા ટ્રેક્ટર નંબર જીજે 09 બી 8542 અને પ્રવીણકુમાર સરદારજી વણજારા ટ્રેક્ટર નંબર જીજે 24 એએ 4896 વહેલી સવારે પોતાના ટ્રેક્ટરમાં માટી ભરી રહ્યા હતા. જાણ થતા ગ્રામજનો તાત્કાલીક ઘટના સ્થળે પહોંચી ટ્રેક્ટર કબજે કરી પાટણ ખાણ અને ખનીજ વિભાગને જાણ કરી હતી. પાટણ ખાણ અને ખનીજ વિભાગની ટીમ તાત્કાલિક ઘટના સ્થળે પહોંચી હતી. પકડાયેલા બે ટ્રેક્ટર પૈકી ત્રણમાં ત્રણ ટન માટી ભરેલી હતી. 80 હજારનો દંડ સ્થળ પર જ વસૂલવામાં આવ્યો હતો.બંને ટ્રેક્ટર ચાલકો ઝડપાઈ જતાં ખનીજ ચોરોમાં ફફડાટ ફેલાઈ ગયો હતો.