મુંબઈઃ ઉદ્યોગના સૂત્રોએ જણાવ્યું હતું કે ઓક્ટોબરથી શરૂ થતી 2023-24 ખાંડની સિઝનના પ્રથમ ત્રણ મહિનામાં ખાંડનું ઉત્પાદન વાર્ષિક ધોરણે 7.60 ટકા ઘટીને 11.2 મિલિયન ટન થયું હતું. નેશનલ ફેડરેશન ઓફ કોઓપરેટિવ સુગર ફેક્ટરીઝના સૂત્રોએ જણાવ્યું હતું કે કુલ ખાંડના ઉત્પાદનમાં ઘટાડો મહારાષ્ટ્ર અને કર્ણાટકમાં ઓછા ઉત્પાદનને કારણે થયો છે.
ચાલુ સિઝનમાં મહારાષ્ટ્રનું ઉત્પાદન ગત વર્ષે ઓક્ટોબર-ડિસેમ્બરમાં 47.40 લાખ ટનની સરખામણીએ ઘટીને 38.20 લાખ ટન થયું છે, જ્યારે કર્ણાટકમાં આ આંકડો 10 ટકા ઘટીને 24 લાખ ટન થયો છે.
જ્યારે ઉત્તર પ્રદેશમાં ઉત્પાદન 12.50 ટકા વધીને 35 લાખ ટન થયું છે.
2023માં નબળા ચોમાસાની સ્થિતિને કારણે શેરડીના ઉત્પાદનને અસર થઈ છે, જેના કારણે ખાંડની માંગ કરતા ઉત્પાદન ઓછું થવાની સંભાવના છે. આવી સ્થિતિમાં ભારતને છેલ્લા સાત વર્ષમાં પહેલીવાર ખાંડની આયાત કરવાની ફરજ પડી શકે છે.
મહત્વાકાંક્ષી જૈવ ઇંધણ કાર્યક્રમમાં વિક્ષેપ ન આવે તે માટે, ભારત સરકારે ઇથેનોલના ઉત્પાદનમાં 1.7 લાખ ટન ખાંડનો ઉપયોગ કરવાની મંજૂરી આપી છે.
સપ્ટેમ્બર 2023માં પૂરા થયેલા પાક વર્ષમાં દેશનું ખાંડનું ઉત્પાદન 33.1 મિલિયન ટન હતું અને ઓક્ટોબરથી શરૂ થતી નવી સિઝનમાં આ સંખ્યા ઘટીને 31.7 મિલિયન ટન થવાની ધારણા છે.
દેશમાં ખાંડની ઉપલબ્ધતા વધારવા માટે સરકારે તેની નિકાસ પર પહેલાથી જ નિયમો લાદી દીધા છે.