બાંગ્લાદેશના ભૂતપૂર્વ વડા પ્રધાન અને અવામી લીગના વડા શેખ હસીનાએ સોમવારે પુનરોચ્ચાર કર્યો હતો કે ધરપકડ, ત્રાસ અથવા મૃત્યુના જોખમ છતાં તે ડિસેમ્બરમાં બાંગ્લાદેશ પરત ફરશે. વોશિંગ્ટન ડીસીમાં સેન્ટર ફોર યુએસ-બાંગ્લાદેશ સંબંધો દ્વારા આયોજિત એક કાર્યક્રમમાં એક પ્રશ્નનો જવાબ આપતાં તેણીએ જણાવ્યું હતું કે, “હું ડિસેમ્બરમાં બાંગ્લાદેશ પરત જઈશ.” તેણીએ આ પ્રોગ્રામમાં વર્ચ્યુઅલ રીતે (ઓનલાઈન) ભાગ લીધો હતો. હસીનાએ કહ્યું, “હું જાણું છું કે તેઓ મારી હત્યા કરી શકે છે, ધરપકડ કરી શકે છે અને ત્રાસ આપી શકે છે. આમ છતાં હું ડરતી નથી.” 79 વર્ષીય હસીનાએ કહ્યું કે તેણે ભૂતકાળમાં ધરપકડ અને ત્રાસનો સામનો કર્યો છે પરંતુ હજુ પણ તે પરત ફરવા માંગે છે. “ત્યાં જવાની જવાબદારી મારી છે,” તેણે કહ્યું.
શેખ હસીના 5 ઓગસ્ટ, 2024 ના રોજ વિદ્યાર્થી આંદોલન બાદ સત્તા ગુમાવી ત્યારથી ભારતમાં રહે છે. પાછા ફરવાના તેમના સંકલ્પને પુનરોચ્ચાર કરતા, તેમણે કહ્યું, “હું જાણું છું કે તેઓ મને મારી શકે છે, ધરપકડ કરી શકે છે અને ત્રાસ આપી શકે છે, પરંતુ ડર મારી ફરજ નક્કી કરી શકતો નથી.” હસીનાએ સ્પષ્ટ કર્યું કે ડિસેમ્બરમાં તેમની અને અવામી લીગની વાપસી સત્તા પર કબજો કરવા માટે નથી, પરંતુ બાંગ્લાદેશમાં વિકાસ, બિનસાંપ્રદાયિકતા અને સ્થિરતા પુનઃસ્થાપિત કરવા માટે છે. તેમણે વધુમાં કહ્યું કે જો મૃત્યુ આવવું જ જોઈએ તો તે પોતાની માતૃભૂમિની ધરતી પર આવવું જોઈએ જ્યાં તેમના માતા-પિતાની સમાધિ છે અને જ્યાં તેમનું લોહી વહાવવામાં આવ્યું છે.
ટ્રમ્પનો આભાર અને તારિક રહેમાન પર આકરા પ્રહારો
ઈન્ડિયા ટુડે અનુસાર, કાર્યક્રમ દરમિયાન શેખ હસીનાએ અમેરિકી રાષ્ટ્રપતિ ડોનાલ્ડ ટ્રમ્પનો આભાર માન્યો અને કહ્યું કે યુએસએઆઈડી ફંડિંગ રોકવાના તેમના નિર્ણયથી પૈસા ખોટા હાથમાં જતા અટકશે. આ સાથે તેણે તારિક રહેમાનની આગેવાની હેઠળની બાંગ્લાદેશ સરકારને ભ્રષ્ટ ગણાવી અને તેના પર મોટા પાયે બેરોજગારી, મહિલાઓ સાથે ગેરવર્તન અને છેડતીના ગંભીર આરોપો લગાવ્યા.
મૃત્યુદંડની સજા અને પ્રત્યાર્પણની માંગ
નોંધનીય છે કે નવેમ્બર 2025માં બાંગ્લાદેશની ઈન્ટરનેશનલ ક્રિમિનલ ટ્રિબ્યુનલે 2024ના વિરોધ પ્રદર્શન પર કાર્યવાહીના સંદર્ભમાં ગેરહાજરીમાં શેખ હસીનાને મોતની સજા સંભળાવી હતી. હસીનાએ આ આરોપોને સંપૂર્ણપણે ફગાવી દીધા છે અને તેમને રાજકીય રીતે પ્રેરિત ગણાવ્યા છે. ઢાકાએ ભારત પાસે તેના પ્રત્યાર્પણની માંગ કરી છે, જેના પર નવી દિલ્હીએ કહ્યું છે કે તે તેની આંતરિક કાનૂની અને ન્યાયિક પ્રક્રિયાઓ હેઠળ આ વિનંતીની તપાસ કરી રહી છે.
