ડીસા તાલુકામાં બે અલગ-અલગ જગ્યાએ પોલીસે દરોડા પાડી જુગાર રમતા 8 લોકોની ધરપકડ કરી હતી. જેમાં પોલીસે જુગાર સાહિત્ય અને રોકડ સહિત કુલ રૂ.1.59 લાખનો મુદ્દામાલ કબજે કરી આગળની કાર્યવાહી હાથ ધરી છે. જેમાં આજે જીલ્લા એલસીબીની ટીમ ડીસા તાલુકામાં પેટ્રોલીંગમાં હતી તે જ સમયે તેમને બાતમી મળી હતી કે ગેરડા ગામે કેટલાક લોકો જુગાર રમી રહ્યા છે. જેથી એલસીબીની ટીમ ગેરડા ગામે પહોંચી હતી જ્યાં કેદારનગર જવાના રસ્તે ત્રણ શખ્સો જુગાર રમતા હતા. આથી પોલીસે ત્રણ લોકોની અટકાયત કરી હતી અને તેમની પાસેથી રોકડ સહિત રૂ. 29,000ની કિંમતનો મુદ્દામાલ કબજે કર્યો હતો.
આ ઉપરાંત તે ખાનગીમાં જુગાર રમાતો હોવાની પણ ભીલડી પોલીસને બાતમી મળી હતી. જેથી પોલીસ ટીમે ઓઢવા ગામે પહોંચી તપાસ કરી હતી જ્યાં એક ખેતરના અજવાળામાં કેટલાક લોકો જુગાર રમી રહ્યા હતા. જેથી પોલીસે દરોડો પાડી પાંચ શખ્સોને જુગાર રમતા રંગે હાથે ઝડપ્યા હતા. ભીલડી પોલીસે કુલ પાંચ લોકોની ધરપકડ કરી તેમની પાસેથી જુગાર સાહિત્ય અને રોકડ સહિત કુલ રૂ.1.29 લાખનો મુદ્દામાલ કબજે કરી આગળની કાર્યવાહી હાથ ધરી છે.