ડીસાના વોર્ડ નંબર 10માં લાંબા સમયથી ગટરના પાણી વધતા લોકો પરેશાન છે. રોગચાળો વકરે તે પહેલા ગટરના ગંદા પાણીના નિકાલ માટે કાયમી ઉકેલ લાવવા રહીશો માંગ કરી રહ્યા છે. ડીસાના વોર્ડ નંબર 10માં આવેલ ગોપાલ નગર રબારીવાસ વિસ્તારમાં લાંબા સમયથી ગટર બંધ છે અને તેના કારણે ગટરનું ગંદુ પાણી રોડ પર વહી રહ્યું છે. આ વિસ્તારમાં અનેક જગ્યાએ ગટરનું પાણી ઓવરફ્લો થતાં ખાડાઓ ગંદા પાણીથી ભરાઈ ગયા છે. આવી સ્થિતિમાં મચ્છરોનો ઉપદ્રવ પણ વધી ગયો છે. ગંદા પાણીના કારણે રોગચાળો ફેલાવાની દહેશત છે.
આ અંગે રહીશ મહેશભાઈ સહિત સ્થાનિક લોકોએ જણાવ્યું હતું કે અમારા વિસ્તારમાં ગંદુ પાણી વધી રહ્યું છે અને ઘર આગળ ગંદુ પાણી ભરાઈ રહ્યું છે, ત્યારે હવે લોકોએ આ સમસ્યા અંગે ફરિયાદ કરી છે. ત્યારે પાલિકા આ સમસ્યાનો કાયમી ઉકેલ લાવે તેવી માંગ ઉઠી છે. તેમણે પાલિકા અધ્યક્ષ સંગીતાબેન દવે અને પાણી પુરવઠા અધ્યક્ષ અને વોર્ડ નંબર 10ના નગરસેવક અમિત રાજગોર સાથે વાત કરી લોકોને આ સમસ્યામાંથી તાત્કાલિક છુટકારો અપાવવાની ખાતરી આપી હતી.