ડીસામાં એક ઘટના પ્રકાશમાં આવી છે જ્યાં 10 થી વધુ લોકોના જૂથે રાત્રે જાહેર માર્ગ પર ખુલ્લી તલવારો સાથે કેક કાપીને જન્મદિવસની ઉજવણી કરી હતી. આ સમગ્ર ઘટનાનો સીસીટીવી વિડીયો વાયરલ થતા લોકો જાહેર માર્ગને બાનમાં રાખનાર તત્વો સામે કાર્યવાહી કરવા માંગ કરી રહ્યા છે. ડીસા શહેરમાં છેલ્લા ઘણા સમયથી અસામાજિક તત્વોનો આતંક વધી ગયો છે. તેવામાં વાડી રોડ પર ગત રાત્રે દસ યુવાનોના ટોળાએ ખુલ્લી તલવારો સાથે આતંક મચાવ્યો હતો. જેમાં 10 થી વધુ યુવાનોના ટોળાએ પોતાની બાઇક રોડની વચ્ચે પાર્ક કરીને ખુલ્લી તલવારો વડે કેક કાપી જન્મદિવસની ઉજવણી કરી હતી.
10 થી વધુ યુવાનોનું ટોળું ખુલ્લી તલવારો સાથે રસ્તા પર ઉભા રહીને પસાર થતા લોકોમાં ભયનો માહોલ ઉભો કર્યો હતો. ત્યાંથી બહાર આવતા લોકો પણ ડરી ગયા હતા. ઘટના બાદ સ્થાનિક રહીશોએ પોલીસને ઘટનાની જાણ કરી હતી. જોકે મોડે સુધી પોલીસ ન આવતાં આ લોકો જન્મદિવસની ઉજવણી કરીને ચાલ્યા ગયા હતા. આ પછી ડીસા શહેર ઉત્તર પોલીસે આ મામલે તપાસ હાથ ધરી છે. ખુલ્લી તલવારો સાથે જાહેર માર્ગોને બાનમાં રાખનારા તત્વો સામે કડક કાર્યવાહી કરવામાં આવે તેવી સ્થાનિક લોકોએ માંગ કરી છે.