ઉત્તર ગુજરાત સહિત પાટણ જિલ્લો ખાસ કરીને ખેતી પર નિર્ભર છે. સમગ્ર જિલ્લામાં ઠંડીનો માહોલ શરૂ થતાં જિલ્લામાં ખેડૂતોએ રવિ પાકનું વધુ વાવેતર કર્યું છે. સમગ્ર પંથકમાં રવિ પાકમાં મહત્વના રોકડીયા પાક રાયડાનું વાવેતર કરવામાં આવી રહ્યું છે. જિલ્લાના પાટણ પંથક સહિત આસપાસના ગ્રામ્ય વિસ્તારોમાં રાયડાનું વાવેતર સારા પ્રમાણમાં જોવા મળી રહ્યું છે. પાટણ જિલ્લો મુખ્યત્વે ખેતી અને પશુપાલન પર નિર્ભર છે. જિલ્લા સહિત પંથક અને ગ્રામ્ય વિસ્તારના ખેડૂતો ઘઉં, જુવાર, મેથી, રજકો, ઇસબગુલ તેમજ રોકડીયા પાક રાયડો અને એરંડાની ખેતી ખાસ કરીને રવિ સિઝનમાં મોટા પ્રમાણમાં કરે છે. છેલ્લા બે-ત્રણ દિવસથી વધી રહેલી ઠંડીના કારણે રાજ્યના ખેતરોમાં ઉગતા રાયડાના ફૂલો ખીલી ઉઠ્યા છે. જેના કારણે રાયડાના ખેતરોમાં જાણે પીળી ચાદર પથરાઈ ગઈ હોય તેવું લાગી રહ્યું છે. આવા સંજોગોમાં રાયડાનો ખીલતો પાક જોઈને મન મોહી લે તેવું છે.
પાટણ જિલ્લા સહિત પંથકમાં મળી કુલ 28914 હેક્ટર જમીનમાં રાયડાનું પુષ્કળ પ્રમાણમાં વાવેતર થવાને કારણે આ ખેતરો જાણે ચાદરથી ઢંકાઈ ગયા હોય તેમ લાગે છે. આવી સ્થિતિમાં પાટણ પંથકમાં રવિ સિઝનમાં રાયડા અને અન્ય પાકોનું બમ્પર ઉત્પાદન જોવા મળી રહ્યું છે.