યુએસ પ્રમુખ ડોનાલ્ડ ટ્રમ્પના નરમ વલણ વચ્ચે રશિયાના સૈન્ય માળખાને નિશાન બનાવતા યુરોપિયન યુનિયને સોમવારે મોસ્કો સામે તેની સૌથી મોટી કાર્યવાહી કરી છે. તેણે 1600 રશિયન લોકો અને કંપનીઓ પર પ્રતિબંધો લાદ્યા. તે બધા રશિયન શસ્ત્ર ઉદ્યોગ સાથે જોડાયેલા છે. યુએસ પ્રમુખ ડોનાલ્ડ ટ્રમ્પે રશિયા સાથે ઓઈલ ડીલની જાહેરાત કરી છે ત્યારે ઈયુએ કડક પ્રતિબંધોની જાહેરાત કરી છે.
આ પ્રતિબંધો મુખ્યત્વે રશિયાના સૈન્ય-ઔદ્યોગિક માળખા અને શસ્ત્રોના ઉત્પાદન અને સપ્લાય ચેઈન સાથે સંકળાયેલા લોકો અને કંપનીઓ પર લાદવામાં આવ્યા છે. EU વિદેશ નીતિના વડા કાજા કલ્લાસે જણાવ્યું હતું કે નવા પ્રતિબંધોમાં અડધાથી વધુ નામો રશિયાની બેલિસ્ટિક મિસાઇલ સપ્લાય ચેઇન સાથે સંબંધિત છે.
આ સિવાય યુક્રેનના કબજા હેઠળના ભાગોમાં નકલી ચૂંટણીઓનું આયોજન કરવા અથવા તેમાં ભાગ લેવાના આરોપમાં 77 લોકોને પણ આ દાયરામાં લાવવામાં આવ્યા છે. આ લોકો અને સંસ્થાઓની સંપત્તિઓ ફ્રીઝ કરવામાં આવશે. આ તાજેતરની કાર્યવાહી પછી, યુરોપિયન યુનિયન દ્વારા રશિયા પર લાદવામાં આવેલા પ્રતિબંધોની કુલ સંખ્યા વધીને 4,500 થી વધુ થઈ ગઈ છે.
ડીઝલની આયાત કરવાનો સોદો
આ પહેલા અમેરિકામાં ઈંધણના ભાવ ઘટાડવાના દબાણને કારણે રાષ્ટ્રપતિ ડોનાલ્ડ ટ્રમ્પે રશિયા પાસેથી ડીઝલ આયાત કરવાની સમજૂતીની જાહેરાત કરી છે. બીબીસીના એક અહેવાલ મુજબ, ટ્રમ્પે કહ્યું કે પુતિન યુએસ અને વૈશ્વિક બજારો માટે તરત જ ત્રણ લાખ ટન ડીઝલ છોડવા માટે સંમત થયા છે, ત્યારબાદ નવેમ્બરમાં પાંચ લાખ ટન અને ત્યારબાદ દસ લાખ ટન. પોતાની ટ્રુથ સોશિયલ પોસ્ટમાં ટ્રમ્પે કહ્યું કે ટુંક સમયમાં રશિયા પાસેથી વધુ 30 લાખ ટન ડીઝલ ઉપલબ્ધ કરાવવામાં આવશે.
