બનાસકાંઠાના ડીસા નજીકના પીપલુ ગામમાં એક જ રાતમાં પાંચ મંદિરોમાં ચોરીની ઘટના પ્રકાશમાં આવી છે. આ મામલે રોષે ભરાયેલા ગ્રામજનો ભીલડી પોલીસ મથકે પહોંચી ચોરને તાત્કાલિક પકડવાની માંગ કરી હતી.ડીસા નજીકના પીપલુ ગામમાં તસ્કરોએ એક જ રાતમાં પાંચ મંદિરોને નિશાન બનાવ્યા છે. ગામના મોટાભાગના લોકો ખેતરોમાં રહે છે. આથી દરરોજની જેમ ગઈકાલે સાંજે પણ મંદિરમાં પૂજા અર્ચના કર્યા બાદ લોકો મંદિર બંધ કરીને ખેતરોમાં ઘરે જવા નીકળ્યા હતા.
રાત્રી દરમિયાન કોઈ અજાણ્યા તસ્કરોએ ગામમાં આવેલા ગોગા મહારાજના મંદિરોને નિશાન બનાવી તમામ મંદિરોના દરવાજાના તાળા તોડી અંદર પ્રવેશી દાનપેટીમાં રાખેલા રૂપિયા અને ચાંદીના છત્રની ચોરી કરી ગયા હતા. સવારે બનાવની જાણ થતાં પૂજારી સહિત ગામના લોકો એકઠા થઈ ગયા હતા. આ ઘટના અંગે મંદિરના પૂજારી ગ્રામજનોએ તાત્કાલિક ભીલડી પોલીસ સ્ટેશનને જાણ કરી ફરિયાદ નોંધવાનો પ્રયાસ કર્યો હતો. પીપલુ ગામમાં થયેલી ચોરી અંગે આગેવાન પાસાભાઈ રબારી અને ભરતભાઈ રબારીએ જણાવ્યું હતું કે, પીપલુ ગામમાં એક સાથે પાંચ મંદિરોમાં ચોરીની ઘટના બની હતી. ચોરોએ મંદિરમાંથી દાનપેટીમાં રાખેલા રૂપિયા અને ચાંદીની છત્રીની ચોરી કરી છે. અમને આશંકા છે કે તે કોઈ અજાણ્યા વ્યક્તિ દ્વારા ચોરી કરવામાં આવી છે. આથી અમે આ અંગે ભીલડી પોલીસમાં ફરિયાદ કરી છે અને અમારી માંગણી છે કે આ ચોરને તાત્કાલિક પકડવામાં આવે.