ગુજરાત સરકાર રાજ્યમાં ફિલ્મ ઉદ્યોગના વિકાસ માટે બોલિવૂડ એવોર્ડ સમારોહનું આયોજન કરવા જઈ રહી છે. ગુજરાતમાં બોલિવૂડ એવોર્ડ સમારોહના આયોજનની જવાબદારી રાજ્યના પ્રવાસન વિભાગને સોંપવામાં આવી છે. રાજ્યમાં પ્રથમવાર બોલિવૂડ એવોર્ડ સમારોહનું આયોજન કરવામાં આવશે. બોલિવૂડ એવોર્ડ ફંક્શન માટે અલગ-અલગ લોકેશન ટેસ્ટ કરવામાં આવી રહ્યા છે. જોકે આ એવોર્ડ ફંક્શન અમદાવાદમાં યોજાશે. રાજ્યમાં પ્રવાસનને પ્રોત્સાહન આપવા અને પ્રવાસન દ્વારા સરકારી તિજોરીની આવકમાં વધારો કરવા માટે રાજ્ય સરકારે બજેટમાં પણ અનેક જોગવાઈઓ કરી છે.
ગુજરાતી જાગરણ સાથે વાત કરતાં પ્રવાસન વિભાગના સચિવ હારિત શુક્લાએ જણાવ્યું હતું કે, ગુજરાતમાં બોલીવુડ એવોર્ડનું આયોજન થશે તો તેની સમગ્ર જવાબદારી પ્રવાસન વિભાગની રહેશે. આ એવોર્ડ ફંક્શન ક્યારે યોજાશે તે એક મહિનામાં ખબર પડશે. એવોર્ડ ફંક્શનના આયોજન માટે પ્રવાસન વિભાગ સંપૂર્ણ રીતે તૈયાર છે. રાજ્યમાં ફિલ્મ ઉદ્યોગનો વિકાસ થાય અને રોજગારીની તકો ઊભી થાય તે માટે રાજ્ય સરકાર દ્વારા પ્રયાસો કરવામાં આવી રહ્યા છે. આ એવોર્ડ સમારોહ રાજ્યના ફિલ્મ ઉદ્યોગને વેગ આપશે. હાલ બોલિવૂડની ફિલ્મોનું શૂટિંગ ગુજરાતમાં થાય તેવા પ્રયાસો ચાલી રહ્યા છે.
લગાન જેવી ઘણી સુપરહિટ ફિલ્મોનું શૂટિંગ રાજ્યમાં થયું છે. ભવિષ્યમાં વધુ ફિલ્મોનું શૂટિંગ ગુજરાતમાં થશે. ફિલ્મ ઉદ્યોગના વિકાસ માટે રાજ્ય સરકાર પ્રયાસો કરી રહી છે. ગુજરાતી ફિલ્મોને પ્રોત્સાહિત કરવા માટે રાજ્ય સરકાર ફિલ્મ સબસિડી પણ આપે છે. આ સિવાય ગુજરાતમાં અત્યાર સુધી માત્ર ગુજરાતી ફિલ્મ એવોર્ડ ફંક્શનનું આયોજન કરવામાં આવ્યું છે. ગુજરાતમાં હજુ સુધી બોલિવૂડ ફિલ્મ એવોર્ડ ફંક્શન યોજાયું નથી. તેથી જ ગુજરાતમાં યોજાનાર બોલિવૂડ ફિલ્મ એવોર્ડ સમારોહ માટે પ્રવાસન વિભાગે વ્યવસ્થા કરી છે.