રોઇટર્સ: મોદી સરકાર લોકસભા ચૂંટણી પહેલા મહિલા ખેડૂતો માટે પ્રધાનમંત્રી કિસાન સન્માન નિધિને બમણી કરી શકે છે. હાલમાં, ખેડૂતોને વર્ષમાં ત્રણ વખત 2,000 રૂપિયાના હપ્તામાં કુલ 6,000 રૂપિયા આપવામાં આવે છે.
મહિલા ખેડૂતો માટે તેને વધારીને 12,000 રૂપિયા કરવાની યોજના પર વિચાર કરવામાં આવી રહ્યો છે. સુત્રોના જણાવ્યા અનુસાર 1 ફેબ્રુઆરીએ રજૂ થનારા બજેટમાં આ યોજનાની જાહેરાત કરવામાં આવે તેવી શક્યતા છે. આ યોજના લાગુ થવાથી સરકાર પર વાર્ષિક 120 અબજ રૂપિયાનો બોજ વધશે.
સૂત્રોના જણાવ્યા અનુસાર સરકાર આ યોજનાને લાગુ કરીને મહિલા સશક્તિકરણની દિશામાં એક પગલું આગળ વધારશે. કૃષિ મંત્રાલય અને નાણા મંત્રાલયે આ અંગે ટિપ્પણી કરવાનો ઇનકાર કર્યો છે. હાલમાં દેશમાં ખેડૂત પરિવારોની વસ્તી 26 કરોડ છે. આમાંથી 60 ટકા મહિલાઓ છે.
સરકારી આંકડાઓ અનુસાર, આ વસ્તીના માત્ર 13 ટકા લોકો ખેતીલાયક જમીન ધરાવે છે. સરકાર છેલ્લા કેટલાક સમયથી ખેડૂતોને રોકડ રકમ આપી રહી છે. ગયા વર્ષના નવેમ્બર સુધીમાં આવા કુલ 15 હપ્તા આપવામાં આવ્યા છે. સરકારે આ આઇટમ હેઠળ અત્યાર સુધીમાં 2.81 લાખ કરોડ રૂપિયા ચૂકવ્યા છે.