વડોદરા.
તાજેતરમાં જ ગૃહમંત્રીએ રાજ્યભરની જેલોમાં ઓચિંતા દરોડા પાડ્યા હતા. જેમાં ઘણી વસ્તુઓ મળી આવી હતી. આજે વડોદરાની સેન્ટ્રલ જેલમાં એક ચોંકાવનારી ઘટના સામે આવી છે. જેમાં મેડીકલ તપાસમાં વિલંબ થવાના કારણે કામદારે ડોકટરના માથામાં ઈંટ વડે માર્યો હતો. જે બાદ ડોક્ટર બેહોશ થઈ જતાં તેને સારવાર માટે એસએસજી હોસ્પિટલમાં ખસેડવામાં આવ્યો હતો. જ્યાં તેમની તબિયત સ્થિર હોવાનું કહેવાય છે.
વડોદરા શહેરની સેન્ટ્રલ જેલમાં એક પછી એક આરોપીઓને રાખવામાં આવ્યા છે, પરંતુ જેલ સ્ટાફ આરોપીઓથી સુરક્ષિત ન હોવાની ઘટના આજે સામે આવી છે.
આ અંગે વડોદરાની સેન્ટ્રલ જેલમાં છેલ્લા 12 વર્ષથી તબીબ તરીકે ફરજ બજાવતા ડો.નિલેશ ચરપોટે જણાવ્યું હતું કે આજે ઓપીડી દરમિયાન હું અને મેડિકલ ઓફિસર કેદીઓની મેડિકલ તપાસ કરતા હતા.
હું એક દર્દીનું બીપી ચેક કરી રહ્યો હતો ત્યારે મિતુલ ટેલર નામનો કેદી અચાનક સિમેન્ટની ઈંટનો બ્લોક લઈને આવ્યો હતો અને મારા માથાના ડાબા ભાગમાં માર્યો હતો, જેના કારણે હું થોડીવાર માટે બેહોશ થઈ ગયો હતો. જે બાદ જેલ સ્ટાફે મિતુલને પકડી લીધો હતો અને મારા નર્સિંગ સ્ટાફે તરત જ મારા માથામાંથી લોહી વહેતું બંધ કરવા માટે મને સારવાર આપી હતી અને એમ્બ્યુલન્સ મારફતે વધુ સારવાર માટે એસએસજી હોસ્પિટલમાં ખસેડ્યો હતો. જેલની અંદર ડોક્ટર પર હુમલો થયો હોય તેવી આ પહેલી ઘટના છે