રેકોર્ડબ્રેક ઉછાળા બાદ સોનાના ભાવમાં ઘટાડો જોવા મળી રહ્યો છે. વૈશ્વિક બજારોમાં સોનાના ભાવમાં ઘટાડા વચ્ચે ગુરુવારે રાષ્ટ્રીય રાજધાનીમાં સોનાનો ભાવ 250 રૂપિયા ઘટીને 73,700 રૂપિયા પ્રતિ 10 ગ્રામ પર આવી ગયો હતો. HDFC સિક્યોરિટીઝે આ માહિતી આપી હતી. છેલ્લા ટ્રેડિંગ સેશનમાં સોનું 73,950 રૂપિયા પ્રતિ 10 ગ્રામ પર બંધ થયું હતું.
HDFC સિક્યોરિટીઝના વરિષ્ઠ વિશ્લેષક (કોમોડિટી) સૌમિલ ગાંધીએ જણાવ્યું હતું કે, “દિલ્હીના બજારોમાં સોનાની હાજર કિંમત (24 કેરેટ) પ્રતિ 10 ગ્રામ રૂ. 73,700 હતી, જે અગાઉના બંધ ભાવ કરતાં રૂ. 250નો ઘટાડો દર્શાવે છે.” જોકે, ચાંદીનો ભાવ પ્રતિ કિલોગ્રામ રૂ. 86,500 પર યથાવત રહ્યો હતો.
બુધવારે રામનવમી નિમિત્તે બુલિયન બજાર બંધ રહ્યું હતું. આંતરરાષ્ટ્રીય બજાર કોમેક્સ (કોમોડિટી માર્કેટ)માં સ્પોટ સોનું $2,375 પ્રતિ ઔંસ હતું, જે અગાઉના બંધ ભાવ કરતાં $13 ઓછું છે.
ગાંધીએ કહ્યું કે યુએસ ફેડરલ રિઝર્વના ચેરમેન જેરોમ પોવેલની આક્રમક ટિપ્પણીએ સંકેત આપ્યો છે કે યુએસ ફેડરલ રિઝર્વને વ્યાજ દર ઘટાડવામાં અપેક્ષા કરતાં વધુ સમય લાગશે. જેના કારણે ગુરૂવારે સોનાના ભાવમાં ઘટાડો જોવા મળ્યો હતો. જોકે, ચાંદી નજીવા વધારા સાથે 28.25 ડોલર પ્રતિ ઔંસ પર રહી હતી. છેલ્લા સત્રમાં તે 28.20 ડોલર પ્રતિ ઔંસ પર બંધ રહ્યો હતો.
વાયદા બજારમાં સોનાના ભાવમાં વધારો
મજબૂત સ્પોટ ડિમાન્ડ વચ્ચે સટોડિયાઓએ નવા સોદા ખરીદ્યાના કારણે ગુરુવારે વાયદાના વેપારમાં સોનાનો ભાવ રૂ. 32 વધીને રૂ. 72,555 પ્રતિ 10 ગ્રામ થયો હતો. મલ્ટી કોમોડિટી એક્સચેન્જ પર, જૂનમાં ડિલિવરી માટેના કરારની કિંમત રૂ. 32 અથવા 0.14 ટકા વધીને રૂ. 72,555 પ્રતિ 10 ગ્રામ થઈ ગઈ છે. આમાં 21,734 લોટનો વેપાર થયો હતો. બજારના વિશ્લેષકોએ જણાવ્યું હતું કે વેપારીઓ દ્વારા નવા સોદાની ખરીદીને કારણે સોનાના વાયદાના ભાવમાં વધારો થયો છે. વૈશ્વિક સ્તરે, ન્યૂયોર્કમાં સોનું 0.19 ટકા ઘટીને $2,390.50 પ્રતિ ઔંસ થયું હતું.