(એજન્સી)ગાંધીનગર, માર્ચ મહિનાની શરૂઆત સાથે જ અમદાવાદ સહિત રાજ્યના મોટાભાગના શહેરોમાં તાપમાનનો પારો ૪૧ ડિગ્રીને વટાવી ગયો છે. ગરમીના આ વધતા પ્રકોપ વચ્ચે શહેરના માર્ગો પર લીંબુ શરબત, શિકંજી, લીંબુ સોડા અને શેરડીના રસ જેવા ઠંડા પીણાંના સ્ટોલ તથા લારીઓની સંખ્યામાં મોટો વધારો જોવા મળી રહ્યો છે.
લીંબુની માંગમાં થયેલા અચાનક વધારાને કારણે, સામાન્ય રીતે એપ્રિલમાં જોવા મળતો ભાવવધારો આ વર્ષે માર્ચમાં જ જોવા મળી રહ્યો છે, જેમાં લીંબુનો ભાવ પ્રતિ કિલો ૨૦૦થી ૨૫૦ રૂપિયા સુધી પહોંચી ગયો છે. નવાઈની વાત એ છે કે, વર્ષ ૨૦૨૫-૨૬ દરમિયાન જમાલપુર યાર્ડમાં લીંબુની આવક ગત વર્ષ કરતા ૨૦% વધી હોવા છતાં, ભાવમાં થયેલો આ તોતિંગ વધારો સામાન્ય જનતા માટે આઘાતજનક સાબિત થયો છે.
સામાન્ય રીતે લીંબુના ભાવ એપ્રિલ અને મે મહિનામાં વધતા હોય છે, પરંતુ આ વર્ષે માર્ચના પ્રારંભથી જ ભાવ આસમાને પહોંચી ગયા છે. હાલ જમાલપુર એએમસીમાં લીંબુનો જથ્થાબંધ ભાવ પ્રતિ કિલો ૯૦થી ૧૨૦ રૂપિયા છે, જ્યારે છૂટક બજારમાં આ ભાવ સીધો બમણો થઈને ૨૫૦ રૂપિયા સુધી પહોંચી ગયો છે. ઉનાળાના પ્રારંભે જ જે લીંબુ અગાઉ ૬૦થી ૮૦ રૂપિયામાં મળતા હતા, તેના ભાવ માત્ર દસ દિવસમાં વધીને ૨૫૦ રૂપિયા સુધી પહોંચી ગયા છે.
ઉલ્લેખનીય છે કે, વર્ષ ૨૦૨૪-૨૫ની સરખામણીએ વર્ષ ૨૦૨૫-૨૬ દરમિયાન જમાલપુર યાર્ડમાં લીંબુની વાર્ષિક આવક ૩૧ હજાર ક્વિન્ટલ વધીને કુલ ૧.૭૫ લાખ ક્વિન્ટલ થઈ હોવા છતાં ભાવમાં તોતિંગ વધારો જોવા મળી રહ્યો છે.
