અબુજાઃ પશ્ચિમ આફ્રિકન દેશ નાઈજીરિયાના ઉત્તર-પૂર્વીય શહેર મૈદુગુરીમાં સોમવાર. સાંજે ત્રણ જોરદાર વિસ્ફોટોમાં ઓછામાં ઓછા 23 લોકો માર્યા ગયા હતા, જ્યારે 108 થી વધુ લોકો ઘાયલ થયા હતા. પોલીસે મંગળવારે આ જાણકારી આપી.
પોલીસના જણાવ્યા અનુસાર, પ્રાથમિક તપાસમાં શંકા છે કે હુમલાઓ આત્મઘાતી બોમ્બરોએ કર્યા હતા જેમણે અલગ-અલગ સ્થળોએ ઇમ્પ્રુવાઇઝ્ડ એક્સપ્લોઝિવ ડિવાઇસ (IED) વડે વિસ્ફોટ કર્યા હતા. હુમલાખોરોએ શહેરના ત્રણ ભીડવાળા વિસ્તારો, મૈદુગુરી સોમવાર માર્કેટ, યુનિવર્સિટી ઓફ મૈદુગુરી ટીચિંગ હોસ્પિટલના ગેટ અને પોસ્ટ ઓફિસ ફ્લાયઓવર વિસ્તારને નિશાન બનાવ્યા હતા.
સિન્હુઆ ન્યૂઝ એજન્સીએ પોલીસને ટાંકીને જણાવ્યું હતું કે સોમવારે સાંજે ત્રણ વિસ્ફોટ રવિવારની રાત અને સોમવારે સવારની વચ્ચે સૈન્ય ચોકી પર થયેલા હુમલા બાદ થયા હતા. આગલી સાંજે લશ્કરી ચોકી પર થયેલા હુમલા અને ડિસેમ્બરમાં મસ્જિદમાં થયેલા બોમ્બ વિસ્ફોટ સાથેના હુમલાઓએ શહેરમાં આતંક મચાવ્યો છે. લાંબા સમયથી આતંકવાદીઓ શહેરોને બદલે ગ્રામીણ વિસ્તારોમાં આવી ગયા છે, જેના કારણે અહીં શાંતિ જળવાઈ રહી છે.
બોકો હરામ અને તેના હરીફ જૂથ ઇસ્લામિક સ્ટેટ વેસ્ટ આફ્રિકા પ્રોવિન્સ (ISWAP) ના લડવૈયાઓએ તાજેતરમાં ઉત્તરપૂર્વીય નાઇજીરીયામાં તેમના હુમલાઓને વેગ આપ્યો છે. દેશમાં તેમનું શાસન સ્થાપિત કરવા માટેના તેમના 16 વર્ષ લાંબા અભિયાનમાં અત્યાર સુધીમાં 40,000 થી વધુ લોકોના જીવ ગયા છે અને લગભગ 20 લાખ લોકો બેઘર થયા છે.
લશ્કરી પ્રવક્તા સાની ઉબાએ એક નિવેદનમાં જણાવ્યું હતું કે, “આ કાયરતાપૂર્ણ હુમલાઓએ ગીચ સાર્વજનિક વિસ્તારોને નિશાન બનાવ્યા; આતંકવાદીઓનો ઉદ્દેશ્ય મોટાપાયે જાન-માલનું નુકસાન પહોંચાડવાનો અને મહાનગરમાં આતંક ફેલાવવાનો હતો.”
આ સ્થળોએ એક પછી એક વિસ્ફોટો થતાં વિસ્તારમાં અરાજકતા સર્જાઈ હતી. ઘટના બાદ તરત જ સુરક્ષા દળોની સંયુક્ત ટીમ ઘટનાસ્થળે પહોંચી હતી અને સમગ્ર વિસ્તારને ઘેરી લીધો હતો અને સર્ચ ઓપરેશન શરૂ કર્યું હતું. અધિકારીઓએ જણાવ્યું કે પરિસ્થિતિ હવે નિયંત્રણમાં છે અને શહેરમાં સુરક્ષા વધારી દેવામાં આવી છે.
