નવી દિલ્હી, એજન્સી. ભારત અને બ્રિટનના વેપાર પ્રધાનો આ અઠવાડિયે લંડનમાં ‘કોમ્પ્રીહેન્સિવ ઈકોનોમિક એન્ડ ટ્રેડ એગ્રીમેન્ટ (CETA)ના અમલીકરણને લગતા મુદ્દાઓ પર વાતચીત કરશે. આ કરારને 15 જુલાઈથી લાગુ કરવાનો પ્રસ્તાવ છે. બુધવારે જારી કરાયેલા એક સત્તાવાર નિવેદન અનુસાર, વાણિજ્ય અને ઉદ્યોગ મંત્રી પીયૂષ ગોયલ આ મુદ્દાઓ પર ચર્ચા કરવા લંડન જશે. તેઓ 25-27 જૂન સુધી લંડનની સત્તાવાર મુલાકાતે જશે. તેમની મુલાકાત દરમિયાન, ગોયલ યુકેના વેપાર અને ઉદ્યોગ પ્રધાન પીટર કાયલ સાથે ઉચ્ચ સ્તરીય દ્વિપક્ષીય બેઠક કરશે.
વેપાર કરાર ચર્ચા
વાણિજ્ય મંત્રાલયે જણાવ્યું હતું કે, “દ્વિપક્ષીય ચર્ચાઓ નિયમનકારી માળખાને સુમેળ સાધવા, સરહદ પાર સંકલન સુધારવા અને સીઇટીએ અને ડીસીસી (ડ્યુઅલ કોન્ટ્રીબ્યુશન એગ્રીમેન્ટ)ના સરળ અમલીકરણ માટે વહીવટી વ્યવસ્થાને અંતિમ સ્વરૂપ આપવા પર ધ્યાન કેન્દ્રિત કરશે.”
ઉદ્યોગ અગ્રણીઓ સાથે બેઠકો
ગોયલ ઉદ્યોગના નેતાઓ, રોકાણકારો અને કંપનીના પ્રતિનિધિઓ સાથે સરકાર અને ઉદ્યોગોની શ્રેણીબદ્ધ બેઠકોમાં પણ ભાગ લેશે. તેઓ HSBC અને Rolls-Royce જેવી અગ્રણી વૈશ્વિક કંપનીઓના વરિષ્ઠ અધિકારીઓને મળશે અને ભારતમાં વ્યૂહાત્મક રોકાણો, ઔદ્યોગિક સહયોગ અને ઉત્પાદન ભાગીદારીના વિસ્તરણ અંગે ચર્ચા કરશે. ભારત અને બ્રિટને 2030 સુધીમાં 120 બિલિયન ડોલરનું દ્વિપક્ષીય વેપાર લક્ષ્ય નક્કી કર્યું છે.
