અમેરિકાના ટેક્સાસ સ્થિત વેલેરો એનર્જી રિફાઈનરીમાં જોરદાર વિસ્ફોટ થયો છે. વિસ્ફોટ એટલો જોરદાર હતો કે આસપાસની જમીન હચમચી ગઈ. આ ઘટનાનો વીડિયો પણ સામે આવ્યો છે. વિસ્ફોટ બાદ રિફાઈનરીમાં આગ ફાટી નીકળી હતી. અહીંથી કાળો ધુમાડો નીકળતો જોવા મળી રહ્યો છે. જો કે આ બ્લાસ્ટનું કારણ હજુ સુધી સ્પષ્ટ થયું નથી. હાલમાં ઈરાન સાથે કોઈ કડી મળી નથી. મળતી માહિતી મુજબ, આ બ્લાસ્ટ 23 માર્ચે સ્થાનિક સમય અનુસાર સાંજે 7.22 કલાકે થયો હતો.
આસપાસના લોકોએ જણાવ્યું કે વિસ્ફોટ એટલો જોરદાર હતો કે નજીકના મકાનો ધ્રૂજી ગયા અને બારીઓના કાચ તૂટી ગયા. આ પછી રિફાઈનરીમાંથી ભારે કાળો ધુમાડો નીકળતો જોવા મળ્યો હતો. પોર્ટ આર્થરમાં ફાયર વિભાગના અધિકારીએ જણાવ્યું કે વિસ્ફોટના કારણની તપાસ કરવામાં આવી રહી છે. હાલ આગ ઓલવવાના પ્રયાસો ચાલુ છે.
અત્યાર સુધીના અહેવાલો અનુસાર આ વિસ્ફોટમાં કોઈના ઘાયલ થવાના સમાચાર નથી. આસપાસના મકાનો ખાલી કરાવવામાં આવ્યા છે. અધિકારીઓ એ જાણવાનો પણ પ્રયાસ કરી રહ્યા છે કે વિસ્ફોટ બાદ લાગેલી આગને કારણે હવામાં કોઈ ઝેરી પદાર્થ ઓગળી ગયો છે કે કેમ. વહીવટીતંત્રે લોકોને ઘરની અંદર રહેવા સૂચના આપી છે.
