ઈરાને દાવો કર્યો છે કે તેણે અમેરિકાના બીજા F-35 ફાઈટર જેટને તોડી પાડ્યું છે. મેહર ન્યૂઝ એજન્સીને ટાંકીને રોઇટર્સે અહેવાલ આપ્યો છે કે આ ઘટના દેશના મધ્ય ભાગમાં બની હતી. ઇસ્લામિક રિવોલ્યુશનરી ગાર્ડ કોર્પ્સ (IRGC) ના એરોસ્પેસ ફોર્સની નવી હવાઈ સંરક્ષણ પ્રણાલીએ જેટને નિશાન બનાવ્યું હતું.
ખાતમ અલ-અંબિયા હેડક્વાર્ટરના પ્રવક્તાએ પ્રેસ ટીવીને જણાવ્યું હતું કે પ્રચંડ વિસ્ફોટને કારણે પાયલોટના બચવાની શક્યતા ઓછી છે. ઈરાનના મતે આ તેની સ્વદેશી સંરક્ષણ પ્રણાલીની સફળતા છે. આ પહેલા 19 માર્ચે ઈરાને પ્રથમ F-35 લાઈટનિંગ-2 જેટને તોડી પાડવાનો દાવો કર્યો હતો, જે અમેરિકાનું સૌથી મહત્વપૂર્ણ 5મી પેઢીના ફાઈટર એરક્રાફ્ટ છે. ઈરાનના મુંબઈ કોન્સ્યુલેટે ઈન્સ્ટાગ્રામ પર વીડિયો શેર કર્યો અને લખ્યું, ‘બીજા દુશ્મન F-35ને અમારી સ્વદેશી સિસ્ટમ દ્વારા ઠાર કરવામાં આવ્યું. ઈરાન એક શક્તિશાળી દેશ છે.
વધતો તણાવ
આ દાવાથી પશ્ચિમ એશિયામાં તણાવ વધુ વધી ગયો છે. ઈરાને ઈઝરાયલ અને કેટલાક ગલ્ફ દેશો પર મિસાઈલો છોડી હતી. તેહરાન અને ઇસ્ફહાન શહેરોમાં વિસ્ફોટોના અવાજો સંભળાયા હતા. તે જ દિવસે, ઈરાની ડ્રોને કુવૈતની મિના અલ-અહમદી ઓઈલ રિફાઈનરી પર હુમલો કર્યો, જેના કારણે આગ લાગી. જો કે કોઈ જાનહાની થઈ ન હતી અને આગ પર કાબુ મેળવી લેવામાં આવ્યો હતો. આ રિફાઈનરી પર અગાઉ પણ અનેકવાર હુમલા થઈ ચૂક્યા છે. ઈરાને ગલ્ફ ક્ષેત્રની ઉર્જા સુવિધાઓ પર હુમલા વધારી દીધા છે અને હોર્મુઝ સ્ટ્રેટ પર તેની પકડ મજબૂત કરી છે, વિશ્વના તેલ અને ગેસના મોટા ભાગના પરિવહનમાં વિક્ષેપ પાડ્યો છે અને તેલના ભાવ આસમાને પહોંચી ગયા છે.
