ઈંધણના ભાવમાં થયેલા અભૂતપૂર્વ વધારાના કારણે લોકોમાં ભારે રોષ ફેલાયો હતો તેના એક દિવસ બાદ પાકિસ્તાનના વડાપ્રધાન શહેબાઝ શરીફે પેટ્રોલના ભાવમાં 80 પાકિસ્તાની રૂપિયાનો ઘટાડો કરવાની જાહેરાત કરી છે. શરીફે શુક્રવારે મોડી રાત્રે પોતાના સંબોધનમાં કહ્યું કે સરકારે પેટ્રોલ પર વધારાની ડ્યુટી (લેવી) 80 રૂપિયા પ્રતિ લિટર ઘટાડવાનો નિર્ણય કર્યો છે, જેના કારણે ગ્રાહકોને પેટ્રોલ પાકિસ્તાની રૂપિયા 378 પ્રતિ લિટરના દરે ઉપલબ્ધ થશે.
બે દિવસ પહેલા જ ભાવમાં વધારો કરવામાં આવ્યો હતો
સરકારે ગુરુવારે પેટ્રોલ અને હાઇ-સ્પીડ ડીઝલના ભાવમાં અનુક્રમે 43 ટકા અને 55 ટકાના અભૂતપૂર્વ વધારાની જાહેરાત કરી હતી. પેટ્રોલની કિંમત PKR 321.17 થી વધારીને PKR 458.41 પ્રતિ લિટર કરવામાં આવી હતી કારણ કે સરકારી લેવી PKR 105 થી PKR 160 પ્રતિ લિટર કરવામાં આવી હતી. વડાપ્રધાને કહ્યું કે, ‘હું પાકિસ્તાની રૂપિયા 80 પ્રતિ લીટર પેટ્રોલના ભાવમાં તાત્કાલિક ઘટાડો કરવાની જાહેરાત કરું છું.’ તેમણે કહ્યું કે 378 રૂપિયા પ્રતિ લિટરની નવી કિંમત મધ્યરાત્રિથી લાગુ કરવામાં આવશે અને દેશભરના પેટ્રોલ પંપો પર આ દરે પેટ્રોલ ઉપલબ્ધ થશે.
એક મહિનાની ગેરંટી
તેમણે કહ્યું કે ઓછામાં ઓછા એક મહિના સુધી પેટ્રોલની કિંમતમાં વધારો કરવામાં આવશે નહીં. શરીફે કહ્યું કે ગલ્ફ રિજનની સ્થિતિને કારણે પેટ્રોલિયમની કિંમતોમાં વધારો થયો છે, પરંતુ સરકાર કિંમતોને નિયંત્રણમાં રાખવા માટે તમામ શક્ય પ્રયાસો કરી રહી છે. “સાવચેતપૂર્વક બચત અને સંસાધનોના ન્યાયપૂર્ણ ઉપયોગ દ્વારા, અમે તમને ફુગાવાના આ તોફાનથી બચાવવાનો પ્રયાસ કર્યો,” તેમણે કહ્યું.
મંત્રીઓના પગાર બંધ
શરીફે કહ્યું કે પહેલા એવું નક્કી કરવામાં આવ્યું હતું કે ફેડરલ કેબિનેટના સભ્યો બે મહિના સુધી પગાર નહીં લે, પરંતુ હવે તેમને છ મહિના સુધી પગાર નહીં મળે. તેમણે કહ્યું, “છેલ્લા ત્રણ અઠવાડિયામાં, મેં દરરોજ વધતી જતી તેલની કિંમતોનો બોજ જનતા પર નાખવાનું યોગ્ય નથી માન્યું, કારણ કે હું સામાન્ય માણસની સમસ્યાઓથી સારી રીતે વાકેફ છું.”
