પશ્ચિમ એશિયામાં ચાલી રહેલું યુદ્ધ અમેરિકા માટે ચિંતાનો વિષય બની રહ્યું છે. આ ભીષણ યુદ્ધ વચ્ચે, ટ્રમ્પ વહીવટીતંત્રે સેટેલાઇટ છબીઓ પ્રકાશિત કરતી સંસ્થાઓ પર પ્રતિબંધ મૂકવાનો પ્રયાસ કર્યો છે. બ્લૂમબર્ગના રિપોર્ટ અનુસાર, યુએસ સરકારે સેટેલાઇટ ઇમેજ પ્રોવાઇડર્સને અમુક વિસ્તારોની તસવીરો રિલીઝ ન કરવા વિનંતી કરી છે.
રિપોર્ટ અનુસાર, પ્લેનેટ લેબ્સ પીબીસીએ યુએસ સેના માટે મહત્વના કેટલાક ક્ષેત્રોના ડેટાની ઍક્સેસને પ્રતિબંધિત કરવાનું શરૂ કર્યું છે. કંપની દ્વારા જારી કરાયેલા નિવેદનમાં કહેવામાં આવ્યું છે કે, “આ યુદ્ધ સમયના સંજોગો છે. અમે તમામ હિતધારકોની જરૂરિયાતોને સંતુલિત કરવાનો પ્રયાસ કરી રહ્યા છીએ. અમે પરિસ્થિતિ પર નજર રાખવાનું ચાલુ રાખીશું અને અમારા ગ્રાહકોને ડેટાની ઉપલબ્ધતા પર અસર ઘટાડવા માટે શક્ય તેટલું બધું કરીશું.” આ રિપોર્ટને લઈને પેન્ટાગોન કે ટ્રમ્પ પ્રશાસન તરફથી કોઈ નિવેદન આવ્યું નથી.
રિપોર્ટ અનુસાર, ટ્રમ્પ એડમિનિસ્ટ્રેશનના આ આદેશને પગલે કંપની હવે પોતાની સેટેલાઇટ તસવીરો માટે “નિયંત્રિત એક્સેસ” મોડલ અપનાવી રહી છે. આ હેઠળ, આ સાઇટ્સ તે વિસ્તારોમાંથી મોડેથી આવતા નવા ચિત્રો પ્રકાશિત કરી રહી છે. આ સિવાય સરકાર દ્વારા કે ખાસ સંજોગોમાં જ ઘણી તસવીરો જાહેર કરવામાં આવી રહી છે.
